Во фаза на подготовки е јубилејното издание на филмскиот фестивал „Астерфест“ кој петта година континуирано се одржува во Струмица. Оваа година фестивалот ќе се одржи од 27 до 31 мај

Струмичкиот филмски фестивал продолжува со интенцијата на освојување нови мултикинематички простори, поврзани со културно-уметничкото наследство на регионот и современите преокупаци на филмските автори на почетокот од третиот милениум. Профилот на интерес се креативната документаристика и кратката филмска форма, кои се повеќе земаат замав во модерната, дигитална ера на филмот во Европа. Покрај традиционалните Златна, Сребрена, Бронзена Потковица и Стар златен проектор за документарни филмови, ќе се доделат и награда за најдобар краток игран филм во светски рамки, а се воведува и посебна награда за македонски филмски автор „Ацо Алексов”, доајенот на македонската филмска и ТВ режија, родум од Струмица. Во последната недела од мај, на неколку градски локации треба премиерно да се прикажат повеќе филмови од многу држави, како и од македонски автори. Мотото на овогодинешниот „Астерфест“ е југоисточни приказни. Фестивалската програма и лауреатот на признанието Астер за животно дело ќе бидат објавени наскоро. Исто така, планирано е како еден од новитетите, завршната вечер да бидат прикажани филмови кои ги освоиле главните награди, а на самото отворање ќе бидат доделени и благодарници на заслужни субјекти за подемот на овој наш фестивал кој темелно се занимава со афирмација на филмската култура во Македонија и светот. Досега, за сите овие години се прикажани над 300 филмови со учество на околу 70 држави од сите меридијани. Оваа манифестација ја организираат продукцијата Астер фест и Тивериополската филмска алијанса, во соработка со национални и локални културни институции.Иницијатор и основач на оваа интернационална филмска манифестација е режисерот Горан Тренчовски. Идејата е промовирана на 28 мај 2005, во рамките на отворениот симпозиум „Старите ѕвезди на новиот екран“ во локалот Ловиште во Струмица.Иницијативата е топло поддржана од група интелектуалци и филмски работници, а првото промотивно ревијално издание се одржа 24-26 јуни 2005.Првите две години фестивалот речиси не добива субвенциии од државата, а последните години е помогнат од Собранието на општина Струмица, Министерството за култура и Филмскиот фонд на Македонија.Досега се прикажани над 300 наслови од околу 70 држави. Филмовите се прикажувани во категориите: Астердокс, Балканска фикција, Една жена – еден филм, Мувиленд, Мери-Дионс, (Сè)човеково право, Посвети. Локации каде се одвивале проекциите се: НУЦК „Антон Панов“, Старо забавиште, Терма Банско, Манастир Вељуса, Хотелите „Тивериопол“, „Илинден“ и „Цар Самоил“, Музеј, Дом на техничка култура.Компетитивна е категоријата Астердокс (за креативни документарци над и под 30 минути) потпишани од автори/професионални режисери со потекло од Европа, кратките филмови од категоријата Мувиленд (која секоја година претставува различна држава) и кратките играни творби од рецентната светска продукција.