На 20 април, во престижниот театар Ла Фениче во Венеција се случи промоцијата на зборникот Охридски пораки за мир за мир и соживот, публикација која произлезе од Меѓународната конференција за меѓурелигиски и меѓуцивилизациски дијалог која пред 2 години се одржа во Охрид

Имено, оваа промоција беше дел од големиот концерт на УНЕСКО, УНЕСКО – Концерт за мир: музика за дијалог и помирување, на кој настапија околу 50 музичари од 12 земји, меѓу кои и Македонија. Покрај маестро Борис Трајанов и тенорот Благој Нацоски, публиката во Венеција уживаше во изведбата на женскиот хор Света Злата Мегленска. За приказната на овој хор кој е единствен од ваков тип во Македонија, како и за впечатоците од Венеција, поразговаравме со основачот и диригентот, Летка Димовска-Полизова.Женскиот камерен хор Света Злата Мегленска е формиран во 1996 г. при Македонската православна црква. Составен е од 22 женски вокали, од кои повеќето се академски образовани музичари и студенти на Факултетот за музичка уметност во Скопје. Госпоѓата Летка Димовска-Полизова како диригент се афирмира со ангажирање на повеќе хорови кои самата успешно ги води: хорот Златно Славејче, Младинскиот мешан хор Кочо Рацин, камерниот хор при Соборниот храм Свети Климент Охридски, детскиот архиепископски хор Херувими итн. Програмски, овој хор најмногу се фокусира врз црковната музика, но во зависност од критериумите на различни фестивали, вметнуваат и композиции од световната и фолклорната музика. Света Злата Мегленска за сите овие години оствари извонредно значајно меѓународно претставување и афирмирање на македонската црковна музика во Велика Британија, Франција, Германија, Португалија, Шпанија, Хрватска, Бугарија, Грција, Полска, Италија, Шведска, Швајцарија, Србија, Црна Гора, Австралија…„Со формирањето на хорот Свети Климент Охридски во 1991 г. и осветувањето на Соборниот храм кај мене се појави интерес за црковното пеење и сакав да дадам и свој придонес кон овој храм. Со хорот Свети Климент Охридски започнавме со литургиски пеења секоја недела и тоа беше прв професионален хор за во црква. Но, мојата креативна моќ беше огромна и сакав да направам нешто повеќе. Така дојдов до идејата да формирам женски хор чиј интерес исто така ќе биде црковната музика, но овојпат да биде концертен и фестивалски хор”, ја започнува приказната госпоѓата Полизова. “Со формирањето на Света Злата Мегленска не само што се слушна за црковната музика надвор од храмовите, туку и за она што значи традиционалната музика во Македонија. Имаме огромен репертоар од православна црковна музика, како и три литургии од различни автори. Тука се, пред сè, Бадев, Сотир Голабовски и Атанас Динев и концертни композиции од светската музичка литература. Практикувам секоја година репертоарот да го збогатувам со 3-4 нови композиции”. Овој хор постојано се развива и „експериментира” и со различни стилови и периоди. На нивните концерти публиката никогаш не останува рамнодушна. Не ретко се случува да видите солзи во очите. Соработуваат и со многу хорови од целиот свет кои се со сличен сензибилитет. Најмалиот успех кој го имаат постигнато е второто место.“На сите тие фестивали и концерти се здобиваме со многу пријатели и така се шири кругот за настапи и соработка. Претежно соработуваме со црковни хорови од Италија, Словенија, Полска, Бугарија, со кои сме се среќавале на фестивалите во различни категории и секогаш сме биле во финалињата и натпреварот за Гран-при наградата. Разменуваме адреси, искуства, се препорачуваме меѓусебно, познавајќи ги сопствените квалитети. Така, за настапот кој во јуни ни следува во Калифорнија, САД, имаме препораки од асоцијацијата Musica Mundi која е организатор на сите светски хорски манифестации. Од таквите познанства произлезе ова патување во Америка”, продолжува госпоѓа Полизова. Во Венеција им понудиле композиции од сите стилови кои ги застапува овој хор – црковна, световна, фолклорна музика, но жирито на крајот се одлучило за македонската традиционална музика. Целиот настап бил збогатен со прекрасните униформи со мотиви од фолклорот кои се идеја на госпоѓата Полизова. „Венеција ја доживеавме онака како што заслужува. Јас буквално лебдев после настапот. Нешто величенствено ми се случи во таа прекрасна сала каде што настапиле имиња како Марија Калас и Павароти. На секој уметник му посакувам да го доживее ова што му се случи на нашиот хор. Не дека сме немале успешни настапи насекаде во светот, а и кај нас, но Венеција е врвот на мојата уметничка кариера. Она што е многу важно, и во Венеција и насекаде каде што сме настапиле, хорот Света Злата Мегленска ја претставува Македонија под уставното име”.Но и покрај сите овие успеси, хорот финансиски не може сам да опстојува. Ниедна од поголемите компании кај нас досега не покажала интерес за финансирање на овие девојки кои се вистински професионалци. Освен поддршката од Министерството за култура и некои донации од дијаспората, немаат други приходи. Се надеваме дека во иднина ваквата состојба ќе се промени.Мал дел од критиките за Света Злата Мегленска„Интерпретацијата на боите е со комплетна динамичка ширина. Секогаш совршено контролиран, вокален звук кој беше употребуван во служба на музиката. Промената на музиката беше пренесена достојно, перфектно и со самодоверба… апсолутна контрола на гласот…” Бил Ајвс, професор на Оксфорд и интернационален музички критичар„Овие прекрасни ангелски гласови нè споија со универзалната убавина.”Жак Лакарер, француски поет, Париз, 1999„Денес се спои небото со земјата. Вие сте Божји дар, што го прими француската публика. Ова е настан на годината.”Јордан Плевнеш, драматург „Со одличниот настап на Вашиот хор, со богатата и висококвалитетна програма со каја настапивте, придонесовте многу за успехот на овој фестивал. Нашите граѓани, како и луѓето од сиот овој регион, Ви се заблагодаруваат за незаборавните моменти на величествената музика и нежните мелодии, кои сè уште одѕвонуваат во нас. Ви честитаме и Ви се заблагодаруваме од дното на нашите срца.”Василиос Аврамидис, градоначалник на Аргос Орестико, Грција, 2002„Кога духовен подвижник каков што е женскиот хор Света Злата Мегленска при МПЦ, ќе најде простор како париската катедрала Сен Северин, почнува празник за поклониците на повеќегласното пеење. Тоа се потврди и неодамна на велигденскиот целовечерен концерт на овој реномиран скопски хор, чии членови небаре материјализирани ангели , просто ја зашеметија париската публика. Диригентката Летка Димовска-Полизова на концертот суверено ја развејуваше и ја собираше звучната прав под сводовите на париската катедрала за на крајот да ја крене публиката на нозе…”Георги Барбаровски, уредник