Uncategorized
Скандал пред премиерата на современата балетска претстава „Боже мој!“

На само неколку денови пред премиерата на современата балетска претстава „Боже мој!“ на холандскиот кореограф Артур Кугелејн, закажана за в среда, 27 мај, на денешната прес конференција во МОБ беа изнесени сериозни обвинувања за односот на оваа куќа кон Кугелејн
Имено, минатата година оваа кореографија е селектирана од страна на директорот на Балетот, Кире Павлов. Оваа кореографија исто така е избрана од страна на познатата Јин Ксинг танцова компанија и ќе биде претставена во Шангај, Кина, во 2010 година. Со финансиска поддршка од Швајцарската културна програма за Западен Балкан понудена минатата година од Про Хелвециа, Македонската опера и балет ја добила оваа кореографија и музиката за неа бесплатно. Премиерата прво била закажана за февруари оваа година, но потоа од непознати причини е одложена за мај. Само десетина дена пред премиерата, поточно во понеделникот на 18 мај, без никакво објаснување, дирекцијата на Балетот одлучила да смени двајца балетски играчи (вкупно играат 12), кои немаат ниту време, ниту толкава енергија да се подготват за премиерата, бидејќи паралелно Балетот подготвува 4 нови проекти, а утре ансамблот заминува за Прага на Деновите на македонската култура. До премиерата, кореографот Кугелејн има само уште една проба и генералната проба.Исто така, Кугелејн тврди дека од МОБ не му е обезбедено ниту дизајнер на светлото и костими. „Можеби постојат причини за ова мое, повеќе од изненадувачко, искуство кое го стекнав тука. Но за мене, кој има работено во различни театари и земји, навистина е тешко да разберам како љубителите на уметноста, како и професионалниот менаџмент на една главна културна институција, како МОБ, може да објасни толку малку почит и време кое ми беше дадено како на еден поканет странски кореограф, заинтересиран да придонесе нешто позитивно за МОБ, како и за публиката тука. Денес, јас навистина се чудам, зошто воопшто дирекцијата на МОБ ме покани и зошто аплицираше за швајцарска финансиска поддршка, бидејќи очигледно е дека нема намера да троши ниту време ниту луѓе за оваа ко-продукција. За мене е болно, но и срамно да видам што направи МОБ од мојата кореографија. Во контекст на овој проект и на моето искуство, МОБ направи се‘ што е можно да ја направи оваа ко-продукција невозможна“, вели Кугелејн во своето соопштение до новинарите. Директорот на МОБ, Оливер Арсовски, изјави дека не гледа голем проблем во целата ситуација и дека за незадоволството на кореографот дознал дури на денешниот прес. „Оваа куќа му ги остави на располагање сите свои услови за работа и се‘ беше во договор со кореографот. Ако тој е незадоволен од досегашната работа, премиерата ќе биде поместена“, изјави Арсовски.Но, сепак е решено премиерата да биде изведена на 27 мај. И покрај сите проблеми, Кугелејн очекува добра претстава и публиката ќе има извонредна можност да види нешто ново од танцот и да биде домаќин на независни танцови компании со нови идеи и нови форми.Инаку, балетот „Боже мој“ („Dios mio!“) за првпат е изведен од мексиканската современа танц компанија „Ballet Teatro del Espacio“ на 27 јули 2007 година во Palacio de Bellas Artes во Мексико Сити. Изведбата во Скопје на 27 мај е всушност римејк на оваа претстава. Во основата на претсавата лежи прашањето за тоа што мислиме кога велиме „О мој боже“. Музиката е на Кристијан Мејер.Играат: Марина Георгиевска, Саша Евтимова (која е и асистент репетитор), Марија Глигорова, Ирена Ковачевска, Маја Костовска, Александра Ѓоревска, Миро Митрашиновиќ, Мартин Саздовски, Борјан Тетиев, Агим Бафтии, Виктор Василевиќ и Јан Кисилев (Русија).Артур Кугелејн се смета за нималку компромисен кореограф, чии дела предизвикуваат силни реакции. Во колаборација со танчерите и музичарите тој создава свој сопствен стил, кој се опишува како радикален, рептитивен, хипнотички „транс танц“. Проектите на Кугелејн – „Masters of Complications“, „After Effects“, „Okidoki stupid things“ се репер за најновите уметнички истражувања во постојната еволуција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Uncategorized
Во обилните дождови во Пакистан загинаа над 300 луѓе

Пакистански спасувачи на северот од земјата денеска вадат затрупани тела од урнатини, кал и буици, каде што невообичаено интензивен монсунски дожд за само 48 часа предизвика смрт на над 320 лица.
Во текот на изминатите два дена, смртоносни поројни дождови погодија неколку области на планинската северна покраина Хајбер-Пахтунхва, каде што се регистрирани 307 смртни случаи, половина од сите смртни случаи оваа сезона на монсуни, покажуваат податоците на Управата за управување со катастрофи.
Повеќето од жртвите беа однесени од поројните поплави и починаа кога нивните куќи се урнаа, од електричен удар или удари од гром.
Во оваа покраина што граничи со Авганистан и каде што сè уште има обилен дожд, повеќе од 2.000 спасувачи работат на пронаоѓање преживеани или извлекување на тела закопани под урнатините, изјави денеска Билал Ахмад Фаизи, портпарол на службата за спасување на покраината, пренесен од француските медиуми.
-Обилните дождови, лизгањето на земјиштето и блокираните патишта го отежнуваат пристапот на амбулантните возила, а спасувачите се движат пешки, додаде тој.
Uncategorized
(Фото) По разводот, Ана Ивановиќ не може да ја симне насмевката од лицето, се јави од Мајорка

Српската тенисерка Ана Ивановиќ овие денови максимално го ужива летото судејќи според нејзините објави на „Инстаграм“.
Таа објави неколку фотографии на социјалните мрежи. Позира на плажа и во еден бар, облечена во кафеав фустан од Poupette St Barth со шапка од Hermès и очила за сонце Celine.
Пред тоа таа се пофали и со фотографии од плажа покажувајќи како се сонча и излегува со пријателите, но и дека не ја заборавила својата најголема љубов – тенисот. На сите фотографии во последно време Ивановиќ не симнува насмевка од лицето.
View this post on Instagram
Адвокатот на Ана Ивановиќ, Кристијан Шерц, потврди во изјава за германскиот весник „Билд“ кон крајот на минатиот месец дека поранешната српска тенисерка и светскиот шампион во фудбал, Бастијан Швајнштајгер, се разделиле. Во писмото, кое го доби и германската новинска агенција ДПА, се наведува дека раскинувањето се должи на непомирливи разлики“.
фото: принтскрин
Uncategorized
Голем број битолчани го искористија бесплатниот скрининг за Хепатитис и болести на црниот дроб

По повод Светскиот ден за борба против хепатитис, во Битола се реализираше бесплатен скрининг за хепатитис Б, Ц и ХИВ, како и еластографија, спроведени со мобилната медицинска единица од Скопје.
Настанот беше дел од националната кампања, организиран во партнерство со: Хепар Центар Битола, Министерството за здравство, Клиниката за гастроентерохепатологија, Клиниката за инфективни болести – Скопје, Официјалната комисија за хепатоцелуларен карцином, Општина Битола, Центарот за јавно здравје – Битола и Клиничката болница Битола.
Граѓаните покажаа исклучителен интерес за скринингот, кој поради зголемената посетеност продолжи еден час подолго од планираното – сè до 13:15 часот – со цел да им се овозможи на сите заинтересирани да се тестираат.
Особено значајна беше поддршката од страна на градоначалникот Тони Коњановски, кој лично ја посети мобилната единица и ја поздрави оваа важна здравствена иницијатива.
Националната кампања за бесплатен и анонимен скрининг за навремено детектирање на болести на црн дроб се реализира во 10 градови во државата. Целта е подигнување на свесноста за црнодробните болести, како што се црнодробен карцином, замастување на црниот дроб од алкохолна и неалкохолна природа, цироза и ретки болести на црн дроб.