44-то издание на Македонскиот театарски фестивал „Војдан Чернодрински“ се отвара во петок, 05 јуни, со театарската претстава „Свето срце“ на МНТ-Скопје, во режија на Љубиша Георгиевски

На свеченото отворање ќе бидат доделени наградите за животно дело на актерите Димитар Костов и Љубица Гојковиќ. Истата вечер на полноќ, ќе биде изведена претставата „Таму каде што не сум бил“ на Прилепскиот театар, во режија на Зоја Бузалковска.До 11 јуни театарската публика во Прилеп ќе види вкупно 17 театарски претстави во ON и OFF програмите, а ќе се одржат и 3 трибини. Официјалната ON-програма е следната: „Свето срце“ на МНТ – Скопје, режија Љубиша Георгиевски, „Кинегонда во Карлаленд“ на Драмскиот театар – Скопје, режија Сашо Миленковски, „Тероризам“ на НТ „Јордан Хаџи Константинов- Џинот“ – Велес, режија Александар Ивановски, „Албански ноќи“ на Албанскиот театар – Скопје, режија Ентон Каца, „Сијах Калем“ на Турскиот театар – Скопје, режија Владо Цветановски, „Тетовирани души“ на Кумановски театар, режија Јани Бојаџи, „Црна се чума зададе“ на Битолскиот театар, режија Владимир Милчин, „Глоговиот џбун“ на Народниот театар од Штип, режија Стојан Стојаноски, „Последниот ден на Мисирков“ на Струмички театар, режија Дејан Пројковски и „Тапани во ноќта“ на Прилепски театар, во режија на Мартин Кочовски.Придружната OFF-програма ќе понуди 7 претстави: „Таму каде што не сум бил“ на Прилепски театар, режија Зоја Бузалковска, „Црна птица“, Буден театар – Скопје во соработка со Драмскиот театар, режија Бојан Трифуновски, „Дивите пајки“ на Кумановскиот театар, режија Кирил Петрески, „Лет во три глави“ на МНТ, режија Никола Ристов, „Чернодрински експрес“, копродукциски проект на театар „Скрб и утеха“ и НТ „Јордан Хаџи Константинов – Џинот“ од Велес, режија Јордан Витанов, „Вака, вака и вака“, испитна претстава на студентите од 2-ра година на Факултетот за драмски уметности од класата на Владо Цветановски и Мими Таневска и „Тестостерон“ на Битолски театар, со што свечено ќе биде затворен фестивалот и ќе бидат доделени наградите за најдобрите во минатата театарска сезона.Инаку, Македонскиот театарски фестивал “Војдан Чернодрински” е конституиран 1965 година на иницијатива на Здружението на драмските уметници од Република Македонија. Фестивалот го носи името на основоположникот на македонската драма – Војдан Чернодрински, драмски автор, актер и режисер. Традиционално секоја година се одржува во градот Прилеп во почетокот на месец јуни.Првата претстава на овој реномиран фестивал се одржала на 4 јуни 1965 година.На фестивалот континуирано се презентираат најдобрите театарски/драмски остварувања од целокупната македонска театарска продукција работени според дела од светската драматургија, а особено се афирмира македонското драмско творештво.