Од 8 до 14 јуни во мултимедијалниот центар Мала станица, ќе се одржи втората по ред дискусиона платформа „Форум Скопје“, на која ќе учествуваат 15 интернационални и домашни гости и експерти од областа на архитектурата, урбанизмот, современата уметност, филозофијата и социологијата

„Форум Скопје 2009“ е интернационален проект, кој се труди филозофски да ја „прочита“ социјалната и психолошката состојба на градот, да ја стави на маса и да дискутира отворено. Оваа платформа е во организација на архитекти од Македонија, Австрија и Германија, а како главен организатор се јавува архитектот Иван Мирковски од Виена.„Форум Скопје 2009“ преку дебатите и студентските работилници во Мала станица ќе цели кон давање на еден поинаков аспект за она што му се случува на Скопје по катастрофалниот земјотрес од 1963 година и неговата иднина.„Целта е преку странските екперти да се загатнат теми на кои заедно со македонските гости ќе се дискутира околу можните сценарија на градот на солидарноста – Скопје и неговата перспектива“, вели организаторот Мирковски.Годинешниот „Форум Скопје“ е дел од регионалниот проект „Да зборуваме за критичката уметност“ во кој се вклучени Македонија, Србија, Хрватска и Словенија, а е поддржан од Европската културна фондација. Главната цел е да се создаде ткиво од свесни граѓани кои ќе имаат активен однос кон своето опкружување. Врвните гости од странство ќе дебатираат со македонските интелектуалци и граѓани на Скопје за архитектурата, теоретската архитектура, урбанизмот, социологијата, уметноста, филозофијата.На 8 јуни, како прва вечер на „Форум Скопје 2009“, во Мала Станица од 19 часот е најавено целовечерно предавање на архитектот Антонио Петров од Бостон кој во моментот работи како предавач на прочуениот Харвард во полето на историјата и теоријата на архитектурата и урбаниот и дигиталниот дизајн. Овој врвен интелектуалец со потекло од Македонија за прв пат ќе се претстави пред скопската публика со предавање од ваков тип и е ретка можност за сите заинтересирани да дознаат повеќе за неговата работа на Харвард и последната публикација со тема: „Motion of Matter: Of Disturbed Fundamentals and the Embrace of Strangeness and Indeterminate Dimensions“ и неговата докторска десертација „(Им)материјалноста и просторното присуство на мега и мета црквите во Северна Америка“. Веќе на 9 јуни во Мала Станица, во 19 часот, е најавено и официјалното отворање на „Форум Скопје 2009“ преку претставување на организаторите на оваа платформа, отворање на изложба на фотографии од германскиот архитект Ханс Енгелс на тема „90 години постоење BAUHAUS архитектура“ и џез-концерт на Георги Шарески и Емин Џијан. Од 10 до 14 јуни, со почеток во 19 часот, во Мала Станица, ќе се одржат вечерните дебатни сесии помеѓу млади архитекти од Македонија и гостите од странство.Паралелно со Форумот, како и минатата година, и оваа ќе се одржи workshop со студентите по архитектура од Скопје, кој ќе го води проф. Дивна Пенчиќ, заедно со менторскиот тим составен од странските гости учесници на дебатите. Листата на гости започнува со проф. Ерих Рајт – архитект, урбанист и теоретичар, потоа Габриеле Рајтерер – теоретичар по архитектура, урбанист и социолог од Виена, Каи Воеклер – креатор на Archis Interventions, Инес Толич – докторат за Кензо Танге и неговиот проект за Скопје во Венеција, арх. Срџан Ј. Вајз – архитект и креатор на архитектонското студио NAO од Филаделфија, САД, Марко Санчанин – креатор на Платформа 9,81 од Загреб, архитект Иван Рупник – докторант на Харвард, Сергеј Никољски, архитект од Австрија, Биљана Стефановска, архитект од Дармштад, архитектите Вера Мартинез и Кристиано Лепрати од Берлин, Максимилиан Хартмут – австриски архитект со седиште во Истанбул, Марен Харнак, професор на Hafen City Universität, Хамбург, Александар Петров – архитект од Милано, креатор на СтудиоКолектив, интернационално архитектонско студио и повеќе млади македонски архитекти и теоретичари.Реализацијата на „Форум Скопје 2009“ е овозможена од Про Хелветиа, Европската фондација за култура (ECF) и Амбасадата на Австрија во Македонија.