Во четврток навечер (9-ти септември) со почеток во 20:30 часот, во Музејот на град Скопје ќе се одржи изложба на фотографии на Ѕвонко Плавевски

Со својата прва самостојна изложба на фотографии Ѕвонко Плавевски настојува да ги дофати фасцинациите на неговата генерација од Скопје во кој се формирал. Што е Скопје навечер, како изгледа тој град кога ќе се вклучат вечерните светла, што се случува во него, како тој тогаш воопшто изгледа и што сето тоа може да значи или како сите тие случки и глетки ги доживуваат младите луѓе кои живеат во него? Тоа е прашањето на кое одговор дава серијата фотографии кои ја сочинуваат изложбата „Скопје навечер“. Младиот Плавевски го нуди сопствениот труд на кој работел изминативе неколку години. Намерата на Скопје навечер е да даде свој прилог, сопствено автентично видување на тема која е постојано актуелна, при што Плавевски визуелно формира или вообликува елемент кој е создаден од фасцинацијата на младите од синтагмата која се вклучува во формирањето на нивниот градски идентитет – Скопје навечер.Ќе бидат изложени 30 фотографии во форма на дигитален печат создадени во последниве три години.Ѕвонко Плавевски е роден во Скопје, 1983 г. со фотографија се занимава веќе долга низа години. Како фоторепортер работел во „Македонија денес”, „Денес”, „Македонски спорт” и „Вечер” каде и во мометов работи. Соработува со фотографските агенции  и . Добитник е на наградата „Најдобра илустрација” од Здружението на фоторепортери. Учествувал на повеќе групни изложби.