Откако за неполна година целосно го распродаде првиот тираж од 500 примероци, издавачката куќа „Блесок“ објави второ издание на романот од Османли, книга која jа доби наградата Роман на годината 2009 на „Утрински весник“

„Дваесет и првиот“ на Томислав Осмални, покрај наградата на „Утрински весник“ ја заслужи честа и да биде македонски кандидат за наградата Балканика за 2010 г. „Томислав Османли напишал елегантен, мистичен, интелектуално рафиниран, раскошно структуриран роман за потрагата по тајниот премин кон подоброто утре, кон подобрите места, кон вечноста која наликува на митската змија што се храни од својата опашка. Од друга страна, романот е жестока критика на секојдневието и на нашата македонска судбина постојано да копнееме по друго место, по друг свет, некаде зад куќниот праг, за конечно, откако ќе ја платиме цената на расточувањето на идентитетот и човековото обезличување што тој прекрасен нов свет ни ја испорачува, да се вратиме дома, каде единствено може да се пронајде мистичниот таен премин кон вечното блаженство и спокој. Роман што одушевува и што се чита со едно отворање на кориците“, вели за романот Венко Андоновски.„Пишувајќи го „Дваесет и првиот“, всушност, Османли докажа дека литературата секогаш можела и умеела подобро од сето она што некои технолошки пософистицирани умешности дури сега го откриваат. Дека може и умее дури и повеќе, ама дека за остварувањето на своите реални можности секогаш морала и секогаш ќе мора да го исполни круцијалниот услов: секој добар/врвен текст да најде и соодветно добар читател. Интелигентен, брз, љубопитен, издржлив, храбар, верен, чесен, имагинативен… Гледам дека „Дваесет и првиот“ околу себе среќно ги собира токму таквите читатели“, рече Јелена Лужина.