Крајот на исклучително успешната концертна сезона 2010/11 е резервиран за ново гостување на Симон Трпчески пред публиката во Австралија и Нов Зеланд

Со синоќешниот настап, трета вечер по ред со различна програма, на престижниот „Мидсамер мјузик фестивал“, нашиот виртуоз на пијаното Симон Трпчески ја заокружи најновата серија оркестарски, камерни и рецитални настапи низ Велика Британија, во чии рамки беше солист и на три концерта со Филхармонија оркестарот и диригентот Василиј Петренко (меѓу кои и настапот во лондонската Ројал фестивал Хол).„Се радувам што по четврти пат ќе одам во Австралија и што повторно ќе имам можност да се сретнам со австралиската публика и во Мелбурн и Аделаида (со симфониските оркестри на овие два града – наша заб.). Во Аделаида ќе настапам првпат, а во Мелбурн третпат и ќе се претставам со Концертот број 1 за пијано и оркестар од Рахманинов. Потоа продолжувам и со втората тура низ Нов Зеланд, на неколку концерти со Новозеландскиот симфониски оркестар којшто ми остави исклучително пријатен впечаток за време на мојата посета во 2008 година. Таму ќе го свирам Концертот број 3 на Сергеј Прокофјев и се надевам дека времето ќе ме послужи барем да не биде многу студено, иако е таму зима, за да можам колку што ќе ми дозволи времето да ги вкусам уште еднаш убавините на оваа далечна земја. Во рамките на турнејата ќе одржам и семинар на Универзитетот во Оукленд, град во кој ќе биде и завршниот концерт на 15 јули“, рече Трпчески за Македонското радио. Турнејата во Австралија и Нов Зеланд на овој дел од светот започнува со концертот во Клејтон, Австралија на 24-ти овој месец