Британските власти треба да ја истражат смртта на бившиот руски шпион Александар Литвиненко, побара официјална Москва.

Британските власти треба да ја истражат смртта на бившиот руски шпион Александар Литвиненко, побара официјална Москва.

“Смртта претставува трагедија, и сега, компетентните британски власти треба да го разгледаат случајот“, изјави портпаролот на Кремљ Дмитриј Песков во Хелсинки.

Руските служби уште пред неколку дена демантираат дека имаат каква било врска со случајот Литвиненко.

Бившиот агент на руската Федерална служба за безбедност (ФСБ), поранешна КГБ, почина во една лондонска болница, каде беше примен пред три недели поради општо влошување на здравствената состојба.

Смртта на Литвиненко е контраверзна, каква што беше и личноста на починатиот.

Литвиненко се затрул на 1 ноември. Првата вест е објавена две недели подоцна, со отворањето официјална истрага, иако, уште од првиот ден побарал лекарска помош. Лекарите кои на 15 ноември се уште се мислеа дали станува збор за алергиска реакција или за отров, а од 17 ноември па се до завчера тврдеа дека се 100 отсто сигурни оти Литвиненко бил затруен со талиум, сега наведуваат дека починал поради „затајување на срцето“. Причината не ја знаат.

Завчера соопштија дека по детален преглед со рентген во стомакот се гледале три многу ситни предмети налик на топчиња, но не знаеја да објаснат за што станува збор.

Лондонски “Гардијан“ дознава дека британската полиција ја истражува можноста Литвиненко сам да се отрул, или пак да бил заболен од рак и оти неговата здравствена состојба била последица од хемотерапија.

„Дејли Телеграф“ објави интервју со Андреј Луговој, едно од двете лица кои Скотланд јард сака да ги сослуша во врска со средбата на 1.ноември, во лондонскиот хотел Милениум, каде починатиот Литвиненко наводно испил чај, по што му се слошило.

Овој бивш агент на руската државна безбедност се запознал со Литвиненко пред 10 години, кога бил шеф на обезбедување на московската телевизиска станица ОРТ, што тогаш ја водеше олигархот Борис Березовски.

“Сто посто сум сигурен дека не му понудивме, чај бидејќи јас брзав“, изјавил Луговој за “Дејли Телеграф“, кој во британската Амбасада во Москва, изрази подготвеност да биде сослушан или во Русија или во Британија.

Врската со Березовски, за кого руските медиуми пишуваат дека бил многу близок пријател на Литвиненко, датира уште од 1998 година, кога Литвиненко, наводно, ги разоткрил плановите за атентат на тогаш моќниот тајкун Березовски кој е сега во егзил, во Британија. Веднаш потоа беше уапсен под обвинение дека „и штети на службата“, по што помина девет месеци во затвор.

Тој, пред шест години, пребега во Лондон, а неодамна доби и британско државјанство.

Литвиненко беше познат како остар критичар на претседателот Владимир Путин, и мистериозното заболување коинцидира со состанок во локал во центарот на Лондон со италијанскиот наводен експерт за руските тајни служби, Марио Скарамела, кој имал документи на четири страници околу убиството на новинарката Ана Политковскаја, исто така, остра критичарка на Кремљ. И Литвиненко и Политковскаја, според руските медиуми се поврзани со Березовски.

И двајцата го критикуваа Путин за Чеченија. Но, Литвиненко е поврзан и со наводно спречување на атентат на Путин во 2003. Тој, според официјално, но делумно потврдени податоци, во Лондон бил контактиран од двајца руски државјани кои сакале со него да разгледаат план за атентат на Путин во западна земја, со помош на Чеченци.

Бившиот потполковник, како што објави тогаш „Сандеј тајмс“ за ова му раскажал на Березовски, а тој го посветувал сознанијата да ги пријави во полиција, по што, двајцата Руси, од кои еден е мајор на ФСБ, биле уапсени.

/крај/ме/ис/б