Daily news
(Видео) Тутунарите ќе добијат поголеми субвенции за новата реколта
Владата на денешната седница во уредбата за директни плаќања за 2018 година ја дефинира висината на субвенциите за килограм предаден тутун. Со уредбата, почнувајќи од реколтата 2017 година, тутунарите ќе добиваат повисоки субвенции. Направивме измени во висината на субвенциите, со што директно стимулираме производство на квалитетен тутун.
Конкретно, воведуваме субвенционирање во три нивоа, и тоа:
– субвенцијата за прва класа тутун ќе изнесува 80 денари за килограм, што е прво ниво;
– за втора класа обезбедуваме 70 денари, што е второ ниво;
– третото ниво на субвенционирање изнесува 60 денари за килограм и важи за трета и четврта класа, како за двете дополнителни класи.
„Уште еднаш ќе потенцирам дека на овој начин ќе ги мотивираме тутунарите не само да го зголемат производството на тутун туку и да се насочат кон производство на поквалитетен тутун за да добијат повисока субвенција. Нашите идни политики се во насока на развој на тутунопроизводството, кои ќе ги реализираме не само преку зголемените субвенции за тутунот туку и преку измените во новиот закон за тутун и тутунски производи.
Со новиот закон, кој е веќе подготвен и очекуваме да биде донесен набргу, ќе се укине поднесувањето евидентни листови. Тутунарите директно ќе склучуваат договори со откупните претпријатија. На овој начин им ја олеснуваме административната процедура за склучување на договорите за производство.
Реколтата 2017 е една од најдобрите споредено со изминатите години. Откупот финишира, се постигна највисока просечна откупна цена, тутунот беше со одличен квалитет, што се должи на погодните временски услови. Речиси и да немаше четврта класа на тутун. Се надевам дека и оваа година временските услови ќе ни бидат наклонети за да се постигне квалитетно производство. Досега се откупни повеќе од 23,5 милиони килограми по просечна цена од 217,5 денари за килограм.
Во согласност со откупната цена по класи, вкупната исплатена сума кон тутунарите ќе биде над 80 милиони евра. Со зголемените субвенции ќе им бидат исплатени околу 28 милиони евра исплатени на име субвенции, што значи дека реколтата 2017 година на 23.000 семејства им обезбедува приход од 100 милиони евра.
Во тек е склучувањето на новите договори за реколтата 2018 година и годинава очекуваме зголемување на бројот на склучени договори поради високата откупна цена и интересот на откупувачите.
Како Влада остануваме фокусирани на развојот на тутунопроизводството, од што егзистираат повеќе од 23.000 тутунарски семејства. Нашите идни политики за оваа култура ќе бидат во насока на обезбедување сигурност на производството и непречен откуп.
Во таа насока би сакал да порачам дека не само државата туку во целиот процес на обезбедување сигурен откуп и производство треба да учествуваат и откупните компании, што ќе влијае врз одржливоста и зголемувањето на производството и квалитетот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.