Daily news
Скопје 2014 под „замаглена“ лупа – катастрофа која нема да се руши
Имав меѓународни гости кои сакаа да го видат Музејот на жртвите од комунизмот. По посетата, луѓето се уплашија и не сакаа повеќе да посетат ниту еден објект од нашите знаменитости, рече министерот за култура Роберт Алаѓозовски.
Решение за иднината на проектот Скопје 2014 и натаму нема – кривичниот дел од приказната е замрзнат откако специјалната јавна обвинителка Катица Јанева рече дека во моментов за тоа нема време, а актуелниот министер за култура, Роберт Алаѓозовски, вели дека се скенираат повеќеслојните проблеми со овој проект и кога ќе се заврши со анализата ќе биде распишен меѓународен конкурс за предлози што ќе пресудат на иднината на проектот.
На денешната јавна трибина во Киното Култура, организирана од активистите на невладината „Плоштад Слобода“, се дебатираше за безбедносните, квалитативните, архитектонските, историските, естетските аспекти на проектот што според сите присутни, нанесе непоправлива штета исто така врз многу општествени аспекти.
– Ние нема да рушиме. Скопје 2014 сам по себе е една голема разорна катастрофа, како на главниот град да му се случил земјотресот од 1963 или, пак, Варшавската трагедија од 1945 година. Ќе продолжиме со анализи и ќе биде распишан меѓународен конкурс за идеи, што може да се направи за да се поправи грдата слика и последиците на овој проект, рече Алаѓозовски.
За активистот Никола Наумовски, стручната јавност треба да донесе решение.
– Сметам дека Скопје 2014 ни се случи токму поради тоа што не беа консултирани професионалци во неговата креација и изведба. Иако мене естеткиот аспект и пораката што тој ја праќа најмногу ми пречат, не смеат да се занемарат и безбедносниот, непрофесионалниот, архитектонскиот и криминалниот. Ќе продолжиме со дебати до конечното решение, ни рече Наумовски.
Режисерот Александар Поповски размислува за креативни интервенции.
– Таа ужасна тоталитарна порака што ни ја испраќа Скопје 2014 мора да се смени. Можеби симболично ќе треба да срушиме еден столб, макар од стиропор. Фасадите можат да се изменат, макар да се опкружат со многу природа, дрва, растенија или слично. Што останува за оние одвратни кичести ентериери, неквалитетно направени, не знам. Важно е да се сруши митот што го создаде минатата власт и небулозните историски и културолошки пораки што сака да ги прати, ни рече Поповски.
Ана Василевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.