Daily news
(ВИДЕО) Д-р Елена Костова – номинирана за еден од кандидатите за градоначалник на Кисела Вода
Во тек се внатрепартиските кампањи за избор на кандидати за градоначалник. Битката за општина Кисела Вода за партијата СДСМ ќе ја водат д-р Елена Костова и Филип Темелковски, син на Зоре Темелковски.
Костова е жителка на Кисела Вода 25 години, каде што моментно и живее. Сопруга и мајка на две деца. Лекар специјалист-интернист, работи на Медицинскиот факултет.
Се залага за редовна отчетност и за вклучување на граѓаните уште во првата фаза на креирање на политиките во зависност од приоритетните потреби на жителите на општината, преку објавување редовни извештаи и транспарентно одговарање на сите прашања. Кандидатката за идна градоначалничка на општината смета дека за целосно транспортно, енергетско и комунално фунционирање на општина Кисела Вода потребно е зголемување и проширување на приодните патишта, зголемена мрежна покриеност со електрична енергија и зголемување на капацитетот на трафостаници, зголемување на капацитетот и санирање на постојната фекална и атмосферска канализација и изградба на колектори и прочистителни станици. Според Костова, има поволни услови за гасификација на Кисела Вода бидејќи веќе постојат два главни доводни система на гас, и тоа до фабриките ОХИС и „Усје“. Почнувајќи од ОХИС, првата линија на гасификацијата до граѓаните би била во населбата Пинтија и во Драчево и во делот на индустриската зона во овој реон, а другата би била од Усје до Пржино и Црниче.
Костова предвидува и реконструкција и изградба на нови улици, изградба на нови монтажни катни гаражи за решавање на проблемот со паркинг-места, воведување нови автобуски линии.
Во општина Кисела Вода заедно со граѓаните досега утврдиле нефункционалност на едношалтерскиот систем и непостоење на мрежно-информатичко поврзување со ресорните одделенија во Општината.
Во програмата предвидува грант од општината за сите невработени лица помлади од 35 години кои сакаат да почнат сопствен бизнис во општината, како и даночни олеснувања под ингеренции на Општината во период од 3 години за претпријатијата основани од млади претприемачи до 35 години.
Крајно време е работата на градоначалниците да се евалуира по примерот на бизнис-секторот со индикатори за успех и мерливи параметри. Доблесно е заради народот да прифатиме да работиме по тој принцип, и тоа не само заради сегашна или следна кандидатура туку и платата (барем дел) да зависи од успешноста во реализација на зацртаниот план.
Болница или клиника не постојат во општина Кисела Вода, што во согласност со потребите на граѓаните и намерите на новата локална власт од СДСМ би требало да биде променето, смета Костова. На територијата на општина Кисела Вода е сместен и Републичкиот центар за лекување наркозависници, чија локација во општината е несоодветна и би требало да се дислоцира во договор со Министерството.
„Во рамките на општината ќе формираме тимови за помош на стари и изнемоштени лица, кои еднаш неделно или на повик ќе прават посети и ќе им помагаат при секојдневните активности на старите лица (набавка на лекови и храна за лицата што имаат здравствени тешкотии“, вели Костова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.