Daily news
(ВИДЕО) Груевски се сретна со Хан – реформите мора да се исполнат на патот кон ЕУ
Претседателот на ВМРО-ДПМНЕ, Никола Груевски, заедно со членовите на Извршниот комитет на ВМРО-ДПМНЕ, Илија Димовски и Александар Николоски, оствари средба со еврокомесарот за проширување и добрососедска политика, Јоханес Хан.
На средбата соговорниците разговараа за повеќе актуелни теми поврзани со внатрешните политички случувања, како и исполнување на стратешките интереси на Република Македонија.
Претседателот Груевски посочи дека локалните избори што поминаа беа едни од најлошо организираните, каде што се случија многубројни неправилности, случаи за поткуп, бугарски возови, недостиг на гласачки ливчиња, притисоци, уцени и закани, па сè до поднесување кривични пријави врз градоначалници без правна основа – политички мотивирани, убиство на носител на советничка листа, пукнат череп на градоначалник и други сериозни нарушувања.
Беше посочено дека дел од полицијата беше активен партнер во заплашувањата врз граѓаните, притисоци врз администрацијата и организирањето на криминалните избори. Изборите на кои се случи убиство, насилство, закани и поткуп е криминал и е нешто што не ѝ прилега и се коси со вредностите на земја аспирант за Европската Унија, истакна ВМРО-ДПМНЕ.
Претседателот Никола Груевски истакна дека загрижува нивото на политички притисок што се гради врз судството во Република Македонија, што влијае на создавање атмосфера на страв кај судиите и судските власти и која се пресликува и во другите полиња, како што се медиумите и економијата.
Воедно, тој го информира комесарот Хан за повеќе случаи за нарушување на судските правила и постапки, како и барањето на СЈО за употреба на незаконски стекнати материјали во судските процеси, што укажува на недостиг од постоење фактички докази и прибегнување кон незаконски методи. Членот 12 од Законот за кривичната постапка јасно и недвосмислено пишува дека нелегално стекнати аудио и видеоматерјали не можат да бидат доказ во судска постапка ниту, пак, од нив да се изведуваат докази.
Од страна на ВМРО-ДПМНЕ беше истакнато дека што се однесува до реформските процеси се забележува упорното игнорирање и невклучување на опозицијата во таквиот процес. Освен барањето јавна поддршка, нема суштинско вклучување во процесот и изработување на реформите. Таков случај е и со Законот за администрацијата, кој преставува основа за бркање од работа илјадници професионалци и луѓе што не се поддржувачи на актуелните политики на власта, беше посочено од страна на ВМРО-ДПМНЕ.
Во однос на стратешките приоритети беше посочено дека ВМРО-ДПМНЕ изразува поддршка на евроинтеграциските процеси за кои е потребно суштинско исполнување на реформските приоритети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.