Daily news
Мемфис израмни против СА, Атланта го декласира Вашингтон
Мемфис максимално ја искористи предноста на домашниот терен и со две победи го израмни резултатот во четвртфиналната серија со Сан Антонио на 2-2.
На Западот Голден Стејт победи во Портланд и сега му недостига една победа за пласман во наредната рунда. На Истокот, Торонто го врати брејкот, откако победи во Милвоки и израмни на 2-2, додека Атланта намали во серијата со Вашингтон на 1-2.
Мемфис го доби четвртиот натпревар против Сан Антонио и израми на 2-2 во победи. Четвртиот натпревар Мемфис го доби по едно продолжение 110:108. Мајк Конли со личниот плејоф рекорд (35 поени. 9 скока, 8 асистенции) го предводеше тимот до победата. Бекот на Мемфис го погоди и последниот шут за победа. Одличен меч одигра и Шпанецот Марк Гасол, кој со своите поени му донесе продолжение на својот тим. Гасол имаше учинок од 16 поени и 12 скокови.
Во редовите на Сан Антонио брилијантен беше еден од кандидатите за МВП наградата, Каваи Ленард со учинок од 43 поени, 8 скокови, 6 украдени топки и 3 асистенции, но тој немаше доволна поддршка од соиграчите. На ниво беше само Тони Паркер со 20 поени.
https://www.youtube.com/watch?v=C60ki5wttMM
Портланд загуби од Голден Стејт 113:119, иако во третиот период имаше предност од 16 поени, а Вориорс играа без Кевин Дурент на теренот и тренерот Стив Кер. Џавал Мекги, во третиот период иницираше серија 19:1 со која Голден Стеј се врати во натпреварот.
Стеф Кари со 34, Клеј Томпсон со 24, Андре Игудала со 16 и споменатиот Мекги со 14 поени беа најефикасени кај победникот, додека Портланд го предводеа Си-Џеј Мекалум со 32 и Демијан Лилард со 31 поен.
Торонто во еден „тврд“ натпревар победи во Милвоки 87:76 и го израмни резултатото во серијата на 2-2. Демар Дерозан постигна една третина од поените на Торонто, мечот го заврши со 33 поени, додека Кајл Лаури 14 од 18-те поени реалзиираше во второто полувреме.
Атланта одигра фуриозна прва четвртина против Вашингтон (38:20) и по 12 минути го реши прашањето на победникот. На крајот Атланта славеше 116:98.
Пол Милсап оствари двоен ефект од 29 поени и 15 скокови, а Денис Шредер постигна 27 поени, на кои придодаде девет асистенции. Кај Вашингтон се истакна Џон Вол со 29 кошеви, но тој не доби поддршка од соиграчите. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.