Daily news
Реакција на Кинотека на Македонија за обвинувањата на Милчо Манчевски
Во врска со објавената информација во одреден број медиуми, со наслов „Кинотека на Македонија одбива да ги прати во Шангај филмовите на Милчо Манчевски„, Кинотеката на Македонија би сакала официјално да одговори, при што ги молиме сите медиуми кои ја пренесоа оваа информација, да го пренесат и соопштението на Кинотеката на Македонија.
„Кинотеката би сакала да ја запознае јавноста со неколку работи, кои во соопштението на „Банана филм“ испратено до медиумите, а зад кое соопштение веројатно стои самиот режисер Милчо Манчевски, ги премолчува или намерно ги пренебрегнува.
Во 2015 година, со целосна финансиска поддршка на Министерството за култура, беа дигитализирани четирите играни филмови на режисерот Милчо Манчевски.
На негово барање, дигитализацијата беше направена во лабораторијата на ARRI во Минхен. Значи, ниту еден „странски партнер“ не дал финансиски средства за дигитализација на неговите филмови.
Понатаму, во соопштението се наведува „Ни најмалку не ме изненадува што Кинотеката не сака да ги прати моите филмоиви… Не им е прв пат…“. Би сакале во оваа прилика да го потсетиме г-динот Манчевски, и да ја информираме пошироката јавност, дека
Кинотеката на Македонија, секогаш кога беше побарано од неа, таа ги испраќаше неговите филмови на фестивалите ширум светот. Овде би споменале само неколку: DCP копија од филмот „Пред дождот„, мај 2015 година во Тајпеј, DCP копија од филмот „Пред дождот„, јуни 2015 година во Нови Сад, DCP копија од филмот „Мајки„, август 2015 година во Локарно, DCP копии од филмовите „Прашина„, „Сенки„ и „Мајки„, септември 2015 година во Торонто. И на крај, но не помалку важно, во јануари 2017 година Кинотеката испрати 35 мм. филмска копија од филмот „Пред дождот„, на фестивал во Норвешка.
Уште еднаш би сакале да го потсетиме г-динот Манчевски дека Кинотеката на Македонија, секогаш кога било побарано тоа од неа, ги ипраќала неговите филмови.
И сега за, како што се вели во соопштението, „скандалозното однесување на Кинотеката на Македонија, која одбива да ги прати филмските копии во Шангај…“.
По завршувањето на целокупниот проект за дигитализација на неговите играни филмови, г-динот Милчо Манчевски инсистираше Кинотеката на Македонија да му достави копии од неговите филмови, како би можел тој самиот да ги испраќа филмовите таму каде што тој сака и каде што тој мисли дека треба да се прикажуваат.
Поради тоа, во компанијата ФХ3Х во Скопје, беа направени копии од бараните материјали, повторно со финансиска поддршка на Министерството за култура.
Како резултат на ова барање на г-динот Манчевски, на 12 декември 2015 година, а во присуство на г-ѓата Татјана Ќурчинска-Пепељугоска, како негов претставник, му беа предадени 4 LTO ленти со сите материјали, како и 4 хард дискови со DCP фајли од сите негови филмови.
Во месец март 2017 година, добивме барање за „асистенција во врска со прикажување на филмовите „Пред дождот„, „Прашина„ и „Мајки„ на меѓународниот фестивал во Шангај“, од г-ѓата Татјана Ќурчинска Пепељугоска, при што Кинотеката беше замолена „да излезе во пресрет (?!?) во врска со испраќање на филмовите“.
Во неколкуте преписки со г-ѓата Ќурчинска Пепељугоска, како и со режисерот Манчевски, а и во неколкуте лични телефонски контакти, беше взаемно констатирано дека Кинотеката достави DCP копии до режисерот Манчевски, токму од тие причини, тие, дали Манчевски или Ќурчинска Пепељугоска да ги испраќаат филмовите каде треба.
Уште повеќе, Кинотеката, во оваа комуникација понуди и помош доколку тие имаат некакви технички, или други проблеми, да им излезе во пресрет.
Бидејќи, од нивна страна не беше посочен било каков проблем, ниту побараа било каква помош, остана на тоа дека тие имаат копии од филмовите и тие ќе ги испратат.
Како што може да се забележи, во 2015 година, до предавањето на копиите на г-динот Манчевски, Кинотеката во неколку наврати ги испраќаше неговите филмови.
Се до последното барање за Шангај, односно речиси година и половина, до Кинотеката нема доставено барање за прикажување на дигиталните копии на неговите филмови. Зошто во овој период нема барање до Кинотеката, тоа може да одговори само режисерот Манчевски. Уште повеќе, Кинотеката, на сопствена иницијатива, во меѓувреме прикажувала некои од неговите филмови, се разбира, со претходна дозвола од режисерот Манчевски.
Кинотеката на Македонија, како што може да се види, имала значајна улога во претставувањето на нашиот амбасадор на културата во светот, и затоа мислиме дека не заслужуваме да бидеме наречени „шпедитери“, особено што директорот на Кинотеката никoгaш на г-динот Милчо Манчевски не му рекол дека „Кинотеката не сака да биде негов шпедитер“„ се вели во реакцијата на Кинотека на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.