Сите политички лидери ми потврдија дека изборите мора да се одржат до крајот на април и презедоа обврска овие избори да се подготват  согласно меѓународните стандарди треба, изјави еврокомесарот а соседска политика и пристапни преговори, Јоханес Хан на заедничка прес конференција со премиерот Никола Груевски.

„ОБСЕ/ОДИХР, Советот на Европа се тука за да го понудат своето искуство во подготвувањето и мониторингот на овие избори. Европа е подготвена да ги искористи сите свои ресурси, човечки ресурси за да помогне во однос на изборите, но за да се направи ова важно е да се има соодветна изборна законодавна рамка и за да се донесе оваа законодавна рамка во склад со јунскиот договор при што сите политички лидери се обврзаа дека најдоцна до 6 октомври треба да има договор за содржината на нов изборен законик“, рече Хан.

Тој им честиташе на партиските лидери кои го потпишаа политичкиот договор за личните заложби и обврските кои ги презедоа.

„Со задоволството можам да видам дека опозицијата се врати во парламентот како што беше договорено и дека беше постигнат договор токму на датумот за специјалниот обвинител. Сега му преостанува на Специјалниот јавен обвинител да го преземе овој голем предизвик“, рече Хан.

Тој искажа пофални зборови и за улогата на граѓанскиот сектор во развојот на демократијата.

„Секако дека има потреба од слободно независно граѓанско општество кое ќе има улога во една здрава демократија без притисок. Истото важи и за медиумите“, истакна Хан.

На прашањето какви се неговите очекувањата Македонија да почне со пристапни преговори со Унијата, Хан рече дека е прагматичен и дека работите треба да ги преземаме чекор по чекор.

„Имаше внатрешен политички конфликт, кој што сѐ уште не е целосно развиен. Меѓународната јавност ја следеше таа состојба, но немојте да мислите дека доколку работите не одат во вистински правец вниманието нема да се насочи кон земјата“, рече Хан.

Според него вниманието сега треба да се насочи на спроведување на она што е договорено во јуни и јули.

„Ако се спроведе се што е договорено може да го преземеме следниот чекор. Она што јас можам да го ветам е дека ќе направиме се за да ги убедиме земјите членки да ги елиминираат нивните резерви во однос на почетокот на преговорите. Ова не може да се направи за неколку месец, се работи за еден процес, но сега барем има заедничко разбирање меѓу сите земји членки дека најдобриот придонес кон развојот на една земја, којашто се уште не е членка на Унијата е да се започне со преговори“, рече Хан.

Премиерот Груевски потенцираше дека истовремено со надминување на предизвиците, Владата продолжува со реформи на сите полиња и со цврстата заложба која ја води за Македонија да ги почне пристапните преговори за влез во ЕУ.

„Сметаме дека постигнатиот договор за политичката криза и процесот на неговата имплементација, треба да се искористи како можност и катализатор за паралелно рестартирање на евроинтеграциските процеси на Македонија. И покрај предизвиците со кои се соочивме, Македонија ќе продолжи со уште посилно темпо да спроведува реформи во областите кои се клучни за нашата интеграција во ЕУ- економијата, правосудството, образованието, медиумската сфера, политичкиот дијалог и продлабочувањето на добрососедските односи ќе бидат во нашиот фокус. Почетокот на пристапните преговори  со Македонија е можен и неопходен  и треба конечно да се случи, како што повеќе години наназад предлага ЕК. Треба да се дозволи тие да течат паралелно со разговорите  за наметнатиот спор за името со нашиот јужен сосед со кого сме одлучни да градиме партнерски односи во рамките на ЕУ и НАТО. Тоа ќе биде најдобра мерка за зајакнување на меѓусебната македонско-грчка доверба“, истакна Груевски.

На разговорите станало збор и за мигрантската криза со која е соочена Македонија, при што Груевски. потенцира дека Македонија покажа солидарна одговорност како европски партнер за надминување на кризата.

Хан повтори дека ЕУ не треба да дозволи балканските земји, вклучувајќи ја и Македонија, да бидат паркинг за мигрантите./крај/