Домашен
Обрван и играчите задоволни од победата над Швајцарија
Победата над Швајцарија, со која македонската ракометна репрезентација стартуваше во квалификациите за пласман на Европското првенство во 2016 година, предизвика задоволство кај играчите и селекторот на националниот тим.
Македонија против Швајцарија забележа рутинска победа (27-20), а она што може да го радува селекторот Ивца Обрван е тоа што има уште многу простор за напредок во играта на тимот. „Можам да бидам задоволен од резултатот. Во овој момент како и за сите репрезентации, чии играчи доаѓаат од клубовите е важно да се забележи стартна победа. Сега имаме три дена до мечот со Чешка, тоа ќе биде тежок меч без оглед на тоа кои играчи кај нив нема да играат. Тие во последните 14 години загубиле само еден натпревар во Чешка, би сакал ние да бидеме тие кои ќе ги поразат по втор пат. Во случај на позитивен резултат ќе имаме исклучително добра ситуација за пласман на ЕП“, рече македонскиот селектор. Репрезентацијата на теренот до победата ја предводеа интернационалците Кирил Лазаров и Борко Ристовски. „Најважно беше да победиме, и пред мечот реков потребна е победа без огледа дали победата ќе биде со добра или со лоша игра. Ние сме задоволни знаеме во каква ситуација е репрезентацијата, доста од овие играчи немаат доволна минутажа во клубовите. Победата е важна и од причина што направивме добра увертира за мечот со Чешка кој ќе биде далеку потежок“, рече голманот Борко Ристовски кој мечот со Швајцарија го заврши со 12 успешни интервенции.„Мислам дека имаме големи резерви, резултатот е супер, имаме можност да играме уште подобро, да играме уште поразновидно и помодерно“, рече по мечот капитенот на националниот тим Кирил Лазаров, кој во победата над Швајцарија постигна 13 голови. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.