Daily news
Трамп својата плата за првиот квартал ја донираше на националните паркови
Американскиот претседател Доналд Трамп својата плата од 78.333 долари, којашто ја доби за првиот квартал минат на функцијата од 20-ти јануари, ја префрлил во Службата за национални паркови на САД, изјави портпаролот на Белата куќа, Шон Спајсер.
„Претседателот е горд што своите приходи за првиот квартал од оваа година ги префрли на Националните паркови“, изјави портпаролот на Белата куќа, Шон Спајсер предавајќи му го чекот на министерот за внатрешни работи, Рајан Зинке.
Службата за национални паркови дејствува во рамките на министерството за внатрешни работи, коешто во САД се занимава со користењето на федералното земјиште и користење на минералите.
„Ова е сумата, до паричка, којашто претседател ја доби за првиот квартал од тековната година“, појасни Спајсер додавајќи дека станува збор за сума пред плаќањето на даноците.
Зинке изјави дека парите ќе бидат вложени во меморијалните комплекси посветени на Граѓанската војна (1861-1865). Тие се наоѓаат на федерално земјиште, а за нивната безбедност и состојба е задолжена спомнатата служба.
„Нашите намери се да ги потрошиме овие средства на развој на инфраструктурата во местата на историските битки на територијата на нашата земја“, изјави министерот додавајќи дека овој оддел цели на буџет од 229 милиони долари. Притоа, проектот за државниот буџет за следната година, разработен од администрацијата на Трамп предвидува намалување на расходите на министерството за внатрешни работи за 12 отсто или на 1,5 милијарди долари.
Портпаролот Спасјер, исто така, истакна дека претседателот самостојно одлучил да ја префрли својата плата на сметката на националните паркови, иако претходно се консултирал со правените советници на Балата куќа кои му претставиле „неколку опции“.
„Претседателот е убеден дека неговите пари ќе бидат добро потрошени, особено кога станува збор за обновувањата на местата на историските битки“, рече Спајсер.
Веднаш по победата на претседателските избори ланскиот ноември Трамп се откажа од годишната плата од 400.000 долари и објави дека има намера да ги подари добротворни цели. Според американските медиуми, богатството на њујоршкиот бизнисмен со недвижнини кој стана 45-от претседател на САД, изнесува околу 4 милијарди долари./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.