Европа
Европа го осуди убиството на Борис Немцов како загуба за руската демократија
Челниците на Европската унија, на Германија и на Франција, во саботата го осудија убиството на рускиот политичар, сега во опозиција, Борис Немцов во петокот навечер во Москва, и истакнаа дека тоа претставува загуба за руската демократија а од руските власти побараа сторителите да бидат изведени пред правдата.
Претставничката на Европската унија за надворешна и безбедносна политика, Федерика Могерини, изрази „згрозување од свирепото убиство“ на 55-годишниот руски опозициски политичар, поранешен вицепремиер Борис Немцов, повикувајќи ги руските власти на „сеопфатна, брза и транспарентна“ истрага.
„Немцов е убиен непосредно пред протестот кој го организираше за 1-ви март против ефектот од економската криза“ предизвикана од санкциите на Западот против Русија поради наводната нејзина улога во украинската криза, се вели во изјавата на Могерини.
Германската канцеларка Ангела Меркел изрази „констернација од кукавичкото убиство“ на Немцов и го повика рускиот претседател Владимир Путин „да се погрижи случајот да биде расветлен а сторителите казнети“.
Меркел ја „цени храброста на поранешниот прв вицепремиер кој постојано ја критикуваше, и јавно, политиката на владата. Канцеларката изрази сочувство со семејството на убиениот и го повика претседателот Путин да осигури истрага за злосторството и да ги изведе сторителите пред правдата“, изјави портпаролот на германската влада Штефен Зајберт.
Францускиот претседател Франсоа Оланд го осуди „гнасното убиство“ на Немцов „храбриот и неуморен бранител на демократијата и борец против корупцијата“.
Немцов, кој беше најгласниот критичар на руската влада за економските политики и корупција, а во последно време стана особено ценет на Запад поради неговата критика на претседателот Путин поради политиките кон Украина, беше убиен додека се шетал со девојката пред полноќ под локално време на мостот преку реката Москва недалеку од Кремљ. Врз него било стрелано од автомобил, биле испукани осум куршуми од кои четири го погодиле Немцов во грбот.
Официјална Москва го осуди убиството на опозицискиот политичар не ја исклучи можноста дека станува збор за политички мотивиран атентат. Во руската престолнина е воведена состојба на зголемена активноста на полицијата и безбедносните служби, како во период кога има сигнали за можен терористички напад. Кремљ од своја страна најави дека во темелната истрага ќе бидат вклучени и разузнавачките служби.
На местото каде што беше убиен Немцов, во саботата московјани оставаат цвеќиња, а постојано е присутна група од околу двесте луѓе.
Градските власти повикаа да ова злосторство да не се злоупотребува на собирот по повод убиството на Борис Немцов кој ќе се одржи во недела за што властите на Москва им издале одобрение за одржување на организаторите кои најавиле присуство на 50.000 луѓе./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.