Европа
Белгија под тревога по апсењето на 15 терористи, ќе ја ангажира војската
Белгија од петокот е под терористичка тревога, а безбедносните сили уапсија вкупно 15 лица осомничени за планирање терористички напади врз полицијата, но засега нема докази за нивна поврзаност со минатонеделните исламистички напади во француската престолнина Париз. Премиерот Шарл Мишел објави дека земјата е подготвена да ја повика војската поради јакнењето на безбедноста, и, исто така, дека неговата влада донела дванаесет мерки за справување со радикализмот и тероризмот.
Тринаесет лица се уапсени во 12 противтерористички рации во белгискиот град Вервиерс и во околината на главниот град Брисел, а уште две во Франција во рамките на истата истрага, потврди во петокот државниот тужител на Белгија. Портпаролот на обвинителството изјави дека засега не е утврдена никаква поврзаност на приведените лица со париските напади во коишто беа убиени 17 луѓе, како и дека сé уште не е утврден идентитетот на двајцата осомничени убиени во четвртокот во Вервиерс.
Покрај оружјето, вклучително и четири автоматски пушки „калашников“ и експлозиви, во еден стан во Вервиерс се пронајдени и полициски униформи, изјави портпаролот Ерик Ван Дер Сипт. „Оваа група планирала да изведе терористички напади врз полицијата на улиците и во полициските станици“, истакнал.
Заменикот државен обвинител Тиери Вертс, претходно изјави дека акцијата е спроведена против група од десет луѓе, од кои некои биле на боиштата во Сирија. „Тие се подготвувале за напади од големи размери, кои требало да се случат многу скоро“, истакна Вертс.
Во одвоени операции за кои функционери велат дека не се поврзани, германската и француската антитерористичка полиција, исто така, објавија дека извршиле неколку апсења.
Белгиските сили за безбедност се ставени во висок степен на подготвеност и обезбедувања на јавните објекти, особено полициските станици низ целата земја. Белгиската јавна телевизија RTBF пренесе дека на полицајците им е кажано да не се движат поединечно додека се на улица во униформа.
Во Белгија и во Холандија се затворени некои еврејски училишта, како реакција на терористичкиот напад од минатиот петок во супермаркетот за еврејска кошер храна и врз редакцијата на сатиричниот неделник Charlie Hebdo. „Париз веројатно ги забрза работите, во смисла сега секоја европска земја да е под тревога. Некои информации кои можеби не беа сосем веродостојни сега се земаа сериозно, бидејќи заканата е стварна“, изјави поранешниот командант на белгиската антитерористичка полиција, Анде Жакоб.
„Војската ќе биде на располагање за да го засилиме нивното на безбедност“, изјави белгискиот премиер Шарл Мишел во петокот по седницата на владата ден по големата антитерористичка операција во Вервиерс, во којашто беа убиени двајца и ранет еден, како што тврди белгиската полиција, џихадисти.
„Дел од специјалните воени сили може многу брзо да бидат распоредени на одредени места, привремено додека владата во Брисел тоа го смета за потребно“, изјави белгискиот министер за одбрана Стефен Вандепут.
Белгиската влада, исто така, донесе дванаесет мерки за борба против радикализмот и тероризмот. Тие мерки, меѓу другото, вклучуваат проширување на можноста за одземање државјанство, привремено одземање на личната карта, одбивање да се издаде пасош, замрзнување на имотот. Се предвидува и борбата против радикализмот во затворите, каде што често младите престапници се изложени на исламистичка индоктринација од дел од затворениците.
Белгискиот премиер Мишел, исто така, побара неформалниот состанок на Европскиот совет, шефовите на државите или влади членки на Европската унија предвиден за 12-ти февруари, да се претвори во формален, што ќе овозможи носење одлуки.
По антитерористичката операција во Белгија, нивото на безбедност е подигнато и во Европската комисија. „Тоа се мерки на претпазливост. Немаме сигнали за некои конкретни закани за европските институции“, изјави портпаролката на Европската комисија, Мина Андреева.
Со околу милион муслимани, главно по потекло од франкофонска северна Африка, Белгија којашто има вкупно 11 милиони жители, како и Франција, во минатото беше сцена на масовни изрази на незадоволство на младите, невработеноста на децата на имигрантите во кои пропаднаа големи индустриски субјекти, како што е и Вервиерс, некогашен центар на белгиската текстилна индустрија.
Од Белгија по глава на жител заминале повеќе исламистички борци во Сирија од која и да е друга европска земја, а тамошните власти веруваат дека околу стотина од нив се вратиле веќе во земјата со борбено искуство. Околу 40 од радикалните белгиски исламисти се убиени, а околу 170 сé уште се борат во Сирија и во Ирак, според податоците на белгиските тајни служби.
Во Белгија од почетокот на 2012 година е забележано засилено дејствување на радикалните исламисти. Во почетокот на јуни 2012-та тие предизвикаа безредија на муслиманската младина во бриселската општина Моленбек-Сен- Жан, откако полицијата приведе девојка облечена во никаб што е забрането според белгискиот закон. Неколку дена по немирите, 53-годишен муслиман француски државјанин Брахим Бахри кој подоцна беше осуден на 17 години затвор, избоде со нож двајца полицајци во бриселското метро. Според признанието на самиот напаѓач дадено веднаш по апсењето, тој дошол од Париз во Брисел „за да ја напаѓа полицијата и да и’ се одмазди на белгиската влада поради воведување на забраната за носење на превезот кај жените муслиманки“.
Шефот на белгиската разузнавачки служби Ален Винантс тогаш предложи да се разгледа донесување забрана за движењето „Шеријат за Белгија“. Потсети дека владите на Велика Британија и Германија веќе ги забранија активности на нивна територија на организацијата „Sharia4Belgium“ која е поврзана со радикалните исламски движења. Според податоците на белгиската разузнавачка служба, од околу милион муслимани во Белгија, околу илјада се салафити.
Како што пишуваше весникот Le Soir во врска со извештајот на Службата за безбедност на Белгија, на агенцијата за разузнавање вниманието и’ го привлекло интензивирањето на салафитското движење во земјата, чии членови го отфрлаат постоењето и функционирањето на демократските институции, како и фактот дека исламските радикали кои се залагаат за враќање кон „чистиот“ ислам, го зајакнуваат своето влијание меѓу муслиманско население во Белгија. Во извештајот до пред две ипол години се забележува растечкото влијание во 2011 година на радикалното исламистичко движење „Шеријат за Белгија“. Интернет страницата на ова движење веќе подолги години објавува содржини со кои ги повикува Белгијците да го прифатат исламот, или „да се подготват за последиците“. Интернет ресурсот, исто така, ги предупредува припадниците на муслиманската вера од стопувањето со белгискиот секуларно општество. Како што беше истакнато во написот Le Soir, белгиските разузнавачки служби сметаат дека исламскиот радикализам, од своја страна, ќе претставува „плодна почва“ за екстремната десница во Белгија, бидејќи тоа ќе им даде адути да играат на карата „борба против исламизацијата на белгиското општество“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.