Европа
Расмусен: Тврдењата на Москва се „шупливи“
Генералниот секретар на НАТО, Андерс Фог Расмусен, ги повторил обвинувањата дека руски трупи учествуваат во судирите во Украина и најави тесна соработка на Алијансата со Киев.
„Соочени сме со сериозна ескалација, а руските воени сили и оружје илегално влегуваат во Украина“, истакна Расмусен пред новинарите по вонредниот состанок со претставниците на Украина кој се одвива во седиштето на НАТО во Брисел и кој беше закажан на барање на украинската страна.
Тој, наводите на Москва дека во воените акции во Украина не учествуваат руски трупи, ги окарактеризира како „шупливи“ и ја обвини Русија дека веќе со месеци работи на дестабилизација на Украина.
„Руската војска директно учествува во воените операции и со себе носи тенкови, оклопни возила и ракетни лансери, а руската артилерија дејствува од двете страни на украинската граница“, истакнал Расмусен и додал дека на границата со Украина се наоѓаат десетици илјади руски војници.
„Станува збор за кршење на меѓународното право кое директно ги поткопува дипломатските напори за смирување на ситуацијата“, истакна генералниот секретар на НАТО.
Рускиот министер за надворешни работи, Сергеј Лавров, претходно изјави дека обвинувањата од Западот на сметка на Русија се неосновани и дека нема доказ со кој би се потврдило учество на Русија во воените акции во Украина.
Расмусен на конференција за новинари во седиштето на НАТО најави поддршка на членките на Алијансата за зачувување на суверенитетот и територијалниот интегритет на Украина и истакна дека ќе биде формиран посебен фонд за помош на украинските одбрамбени сили во логистика, организирање командни синџири, заштита на компјутерски системи и санитетски материјали.
Тој, меѓутоа, не се изјасни по однос на најавите на Киев дека Украина ќе побара да биде примена во НАТО Алијансата.
„Секоја земја има свое суверено право да ја дефинира политиката на одбраната и сама да одлучува за воените сојузи“, нагласи Расмусен додавајќи дека Украина сé уште официјално немала побарано прием во овој воен сојуз.
„Доколку украинскиот парламент ја промени својата претходна одлука за незаземање страна и побара членство во НАТО, ние тоа барање ќе го почитуваме, а тоа очекуваме да го направат сите“, рекол генералниот секретар на НАТО нагласувајќи дека земјите кандидати, освен желба за членство, мора да исполнат и низа технички и политички услови./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Блумберг: САД размислуваат за трансфер на втор систем „Патриот“ во Украина
Соединетите Американски Држави размислуваат да префрлат уште еден систем „Патриот“ во Украина, пишува Блумберг, повикувајќи се на извори запознаени со ова прашање.
Системот вклучува радари и контролни станици, ракетни фрлачи и возила за поддршка.
Германскиот канцелар Олаф Шолц во вторникот најави трансфер на уште еден „Патриот“ во Украина.
Претходно западните медиуми пишуваа дека Украина во последно време соборува се помалку руски ракети.
Европа
Украинците признаа дека Русите влегле во важен град: „Исклучително е тешко“
Шефот на украинската полиција во регионот Харков ја опиша ситуацијата во градот Вовчанск како „исклучително тешка“.
Олексиј Харковски, началникот на полицијата во Вовчанск, на Фејсбук објави дека руските сили воспоставуваат позиции во градот.
Од вчера Русите тврдат дека нивните сили зазеле делови од Вовчанск и пограничното село Бухруватка. Вовчанск е стратешки важен град кој стои на патот на Русите кон Харков, вториот по големина град во Украина.
Вовчанск се наоѓа на околу 5,5 километри од границата на Украина и Русија.
Украинските власти го евакуираат Вовчанск од минатиот петок, кога започна новата руска офанзива на североистокот.
Европа
Русите: Соборивме американски ракети над Крим
Руското Министерство за одбрана соопшти дека нејзините воздушни сили уништиле 10 американски ракети со долг дострел од типот ATACMS, кои украинската армија ги лансираше во текот на ноќта на Крим.
Министерството не соопшти дали има штета, но гувернерот на кримското пристаниште Севастопол, назначен од Русија, изјавил дека остатоци од проектил паднале на станбена зона. Според првичните информации, никој не е повреден, изјави гувернерот Михаил Развозаев.
Русија илегално го анектираше Крим пред точно 10 години. Неодамна, Москва често тврдеше дека Украина почнала да ги користи ракетите ATAMCS, без притоа да презентира никакви докази.
Вчера, американски официјален претставник изјави дека ATACMS и системите за противвоздушна одбрана одобрени од Џо Бајден на 24 април веќе стигнуваат до украинските сили.