Регион
Турскиот парламент ја започна расправата за јакнење на претседателските овластувања
Турскиот парламент во понеделникот ја започна расправата за уставните промени со коишто би се прошириле овластувањата на шефот на државата, должност која во моментов ја извршува претседателот Реџеп Тајип Ердоган, а неговите критичари мисла дека тој на овој начин сака да ја приграби целат власт во земјата.
Предлогот кој е жестоко критикуван од опозицијата, предвидува пренесување на извршната власт од премиерот на претседателот на земјата и би можело да му овозможи на актуелниот шеф на турската држава Реџеп Тајип Ердоган, кој во 2014 година надмоќно беше избран по трите мандата на премиерската должност, во периодот од 2003 до 2014 година, да остане на власт до 2029 година.
Со воведување на претседателскиот систем, по углед на САД, Франција или Русија, би се создала правна основа за сегашниот начин на кој функционира всушност Ердоган кој стана главен фактор на извршната власт ставајќи го во сенка премиерот, спротивно на уставот донесен по воениот преврат од 1980 година за кој се залага секуларната и левоцентристичката опозиција.
За текстот кој парламентарната комисија го прифати кон крајот на 2016 година, пратениците ќе дебатираат во две читања, што ќе потрае најверојатно петнаесет дена, наведува новинската агенција Anadolu.
Проширувањата на овластувањата на претседателот ги загрижува политичките противници на Ердоган кои го обвинуваат за авторитарност, во прв ред по неуспешниот обид за државен преврат со помош на фракција во армијата од 15-ти јули и чистите кои потоа започнаа во турското општество.
Ердогановата исламско-конзервативна Партија на правото и развојот (AKP) тврди дека претседателскиот систем е неопходен за да се обезбеди стабилност во врвот на државата, како и дека тоа на Турција ќе ѝ овозможи да има систем како посочените во САД и во Франција.
Доколку уставната реформа биде усвоена, претседателот по изборот нема да мора да се повлече од својата партија, ќе именува и сменува министри, и ќе има еден или повеќе потпретседатели.
За предлогот сега мора да гласаат најмалку 330 од 550-те пратеници за да може да биде ставен на потврда на референдум. AKP и десната националистичка опозициска партија Партија на националното движење (MHP) која исто така го поддржува текстот од предлогот, имаат заедно 355 пратеници.
Референдумот би требало да се одржи во првата седмица од април, изјави во понеделникот вицепремиерот Нуретин Чанили.
Уставната реформа наидува на решително противење од страна на Републиканска народна партија (CHP) и на прокурдската Народна демократска партија (HDP), кои го обвинуваат Ердоган дека ја користи вонредната состојба воведена по неуспешниот пуч за а го воведе претседателскиот систем./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Регион
Не ги навредив Бугарите, туку ја критикував нашата влада, објасни хрватскиот претседател по изјавата на која реагираше Софија
Хрватскиот претседател Зоран Милановиќ изјави дека со изјавата дека Хрватска е „на дното на ЕУ по повлекувањето на европските пари, а само Бугарија е полоша“, не ги навредил Бугарите, туку ја исмејува хрватската влада која прави „будали и социјални случаи“ од нејзините граѓани.
Милановиќ претходно рече дека „Хрватска е дното на Европската унија и дека само Бугарија е полоша“, па секој ден се молат на Бога, Бугарија да остане последна и ништо да не и се случи, бидејќи во спротивно би била Хрватска“. По изјавата, според хрватските медиуми, Бугарите ја повикале хрватската амбасадорка во Софија, Јасна Огњеновац и изразиле незадоволство, пренесува порталот „Индекс“.
Бугарското Министерство за надворешни работи на хрватскиот амбасадор му пренело „длабоко разочарување од изјавата на претседателот Милановиќ“, каде што истакнале „дека изјавата е неприфатлива за Бугарија и не е во согласност со одличните билатерални односи меѓу Хрватска и Бугарија“.
Тие истакнаа и дека се надеваат дека „хрватската влада ќе се огради од таа изјава“.
„Не ги навредив Бугарите, туку исмевав некои елементи на хрватската влада кои не’ прават будали и социјален случај“, рече шефот на хрватската држава и додаде дека претходно ја критикувал земјата на тема повлекување европски пари.
„Дали можеме да кажеме дека Хрватска се моли Сингапур последен да подигне пари? Дали тоа звучи подобро? Но, Сингапур не е европска земја. Значи некој мора да биде последен. Тоа е Бугарија, а Хрватска е претпоследна“, рече Милановиќ и потсети дека тоа се статистички податоци и дека тоа досега го кажал десет пати.
„Тоа е потсмев, за жал, на сметка на некои во Хрватска кои не прават социјален случај, кои не можат да земат доволно европски средства, па затоа сме претпоследни. Нормално, гледаш кој е последен. Бугарија е последна, секогаш е последна (…) Хрватска е претпоследна“, рече Милановиќ.
„И тоа е факт за кој зборував десет пати. Алелуја (…) Тоа се факти за кои мора да се разговара во политиката бидејќи се многу релевантни податоци. Зошто Хрватска е претпоследна? Зошто не е петата одоздола, или петта одозгора. Зошто не е? Веројатно некој е одговорен за тоа“, додаде тој.
На крајот, како што додаде, никој не се моли Бугарија да пропадне, туку дека неговата изјава е верзија на американската шега за сојузната држава Арканзас, која „се моли на Бога Мисисипи, кој е најсиромашниот, да биде здрав и добро“, бидејќи во спротивно тоа би бил Арканзас.
„За да го знаете тоа, треба да прочитате нешто во животот, а не да се занимавате со селски скандали“, рече Милановиќ.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.