Регион
Церар: Хрватска се однесува неевропски во мигрантската криза
Словенечкиот премиер Миро Церар остро ја критикуваше соседна Хрватска обвинувајќи ја дека во мигрантската криза се однесува „неевропски“ и дека реките имигранти намерно ги испраќа на границата со Словенија, како и дека комуникацијата меѓу двете земји за бегалците не постои.
Во разговорот за Словенечката телевизија во четвртокот вечерта, премиерот Миро Церар рече дека за проблемот со имигрантите во четвртокот телефонски „многу кусо“ разговарал со хрватскиот колега Зоран Милановиќ, како и дека го предупредил оти „намерното и дисперзирано“ донесување на големиот број имигранти на границата со Словенија, и „испраќањето на имигрантите во реките“ претставува „неевропско однесување“ кое може да биде опасно и во иднина да „предизвика конфликти“.
„Забележуваме дека Хрватска не се однесува европски“, рече Церар, додавајќи дека тоа во четвртокот му го објаснил на еврокомесарот за миграции Димитрис Аврамопулос кој престојуваше во Љубљана, како и дека вториот „го дели неговото мислење“.
Церар верува дека таквото однесува на Хрватска „ќе дојде до израз“ и во недела на самитот на балканските и средноевропските држави во Брисел.
Претходно во четвртокот доцна попладнето словенечката министерка за внатрешни работи Весна Ѓеркеш Жнидар соопшти дека Словенија од Европската унија побарала финансиска и материјална помош за згрижување на имигрантите, а таа и друг вид помош на Љубљана ѝ понудила Италија, Австрија и Германија, како и земјите од ткн Вишеградска група, односно Унгарија, Чешка Словачка и Полска.
Жнидар по средбата со Аврамопулос рече дека на Словенија ѝ е понудена и помош Фронтекс, но оти тоа не би го решило проблемот од неконтролираното влегување на имигрантите во Словенија, туку дека Фронтекс би требало да биде упатен во Хрватска како надворешна границата на Европската унија, како и во Грција и да се контролира приливот на имигрантите од Турција.
Словенечките телевизии и во петокот претпладнето продолжија со емитување на драматични сцени со имигрантите на границата со Хрватска, кои сé уште не влегле во словенечките центри за прифаќање, меѓу кои има многу жени и мали деца, како и изјави на словенечки лекари дека имигрантите се многу исцрпени и многумина се дехидрирани и гладни, премрзнати и со вируси и други болести.
Директорот на словенечката полиција, Марјан Фанк, изјави за Словенечката телевизија дека Хрватска не го почитувала договорот постигнат во средата во Виена меѓу директорите на полициите на Австрија, Словенија и Хрватска, за подобра комуникација во мигрантската криза, туку токму спротивно на границата со Словенија ноќта кон четвртокот испратила без најава досега најголем број имигранти и токму „на местата на кои не очекувавме“.
Словенечките хуманитарни организации ги продолжуваат апелите до граѓаните и компаниите да донираат пари, облека, обувки и ќебиња, бидејќи досегашните резерви се исцрпени.
Од друга страна, словенечките медиуми најавуваа дека ќе продолжи доаѓањето на голем број имигранти преку Грција којашто не го контролира приливот, а исто така, дека ќе биде побрзо темпото на пристигнување бидејќи во Србија од неодамна повеќе не се задржуваат привремено во Белград, туку директно одат на границата со Хрватска./крај/мф/сн
Извор: Hina/STA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.