Daily news
Хепатитисот секој ден убива по 400 лица во светот
Од 6 до 10 милиони лица во светот секоја година се погодени од хепатитис. Високата стапка на смртност алармира дека е потребна глобална стратегија за борба со болеста со цел нејзино искоренување, беше посочено минатата среда на конференцијата на Hep-CORE во Берлин, Германија, на која учестуваше и Хепар центарот –Битола.
На конференцијата беа презентирани резултатите од истражувањата во 27 земји од Европа и Балканот со констатација дека постои сериозен јаз во политиките на европските земји против хепатитисот, поради што е потребно да се изгради заеднички европски и балкански пристап за сузбивање на оваа болест.
Пациентите се соочуваат со секојдневни потешкотии и затоа нив им треба поддршка и помош. Тоа е единствено можно доколку секоја земја има стратегија која ќе биде усогласена со стратегиите на другите земји.
„Бев дијагностицирана од хепатитис кога бев бремена. Можете да замислите дека тоа беше најтешкиот период во мојот живот кога сфатив какви последици можам да нанесам и на сопственото дете пренесувајќи му смртоносна болест. Првите пет години од животот на мојата ќерка имавме многу непроспани ноќи. Од тогаш за мене како да беше запишана во ѕвездите дивата сторија со хепатитисот“, рече Татијана Реиќ, претседател на Европска асоцијација на пациенти со болести на џигерот „ЕЛПА“.
Експертите посочуваат дека е многу важно земјите да овозможат ефективни скрининг програми и пристап до медицинска заштита.
„Истражувавме дали земјите имаат стратегија и акциони планови за борба против хепатитисот. Каква превенција преземаат и што е најважно каков третман за пациентите е достапен“, рече Џефри Лазарус, од Институтот за глобално здравје во Барцелона, Шпанија.
Крајната цел на сите овие активности кои ги преземаат организациите кои се занимаваат со сузбивање на хепатитисот е всушност оваа болест да биде целосни елиминирана. Истражувањата сепак покажаа дека за да се постигне тоа треба уште многу да се работи, бидејќи многу земји не ги исполнуваат стандардите до целосно искоренување на болеста на своја територија.
„Целта е процес на елиминација на болеста, но истражувањето покажа дека само половина од земјите имаат стратешки пристап кон проблемот, затоа тука идентификуваме што треба да биде сторено во секоја земја“, вели Ахим Каутз, основач на ЕЛПА.
Инаку, во регионот на Европа во моментот 15 милиони лица живеат со хроничен хепатитис Ц, а 13 милиони со хроничен хепатитис Б. Секој ден по 400 лица умираат од хепатитис. Ова е скандал, беше речено на конференцијата во Берлин бидејќи незамисливо е да се дозволи толкава стапка на смрност кога ќе се земе во предвид дека овие луѓе можат да се лекуваат. Клучно за тоа е земјите да имаат развиена стратегија која вклучува анализа на проблемот, ефективни скрининг програми и достапност до медицинска заштита.
И во Македонија се потребни дополнителни напори за борба против хепатитисот. „Истражувањата во 27 земји покажаа дека состојбата е многу полоша одошто се мислеше. Во Македонија податоците зборуваат дека околу 1% од населението е погодено со оваа болест, но сметаме дека реалната состоба е полоша. Обезбедена е бесплатна терапија за 25 пациенти, но тоа не е доволно. Потребно е да се работи уште многу со цел и во Македонија да се елиминира хепатитисот“, вели Милан Мишковиќ, од Хепар Центарот – Битола.
Големо внимание треба да се се обрне и на пограничните региони, бидејќи и комуникцијата на жителите од соседните земји е канал за пренесување на болеста. Оттука од Хепар центарот посочуваат дека Македонија треба да посвети внимание на состојбите во Албанија.
„Последните податоци покажуваат дека во Албанија преваленцата на хепатит Б изнесува 7 до 10%. Со оглед на тоа што жители на Албанија често транзитираат во Македонија тоа може да биде канал за пренесување на болеста. Затоа е многу важно да се посвети поголемо внимание токму на пограничниот регион. Едукацијата и подигнувањето на свеста може да донесе позитивни промени со цел албанските статистики да не се прелеат во Македонија“, вели Мишковиќ, нагласувајќи дека оттука се препорачува и поголема превентива.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.