Американскиот горен дом на парламентот Сенатот со големо мнозинство во петокот го потврди пензионираниот морнарички генерал Џејмс Матис за нов министер за одбрана, како и Џон Кели на должноста министер за внатрешна/татковинска безбедност.

Матис доби поддршка од 98 од вкупно 100 сенатори, а за потврдата му беше потребно просто мнозинство. За Кели, пак, гласаа 88 а против беа 11 сенатори.

Именувањето на Џејмс Матис преставува преседан бидејќи станува збор за поранешен генерал на вооружените сили, кои бројат 1,9 милиони припадници на активниот и резервниот состав, кој станува висок цивилен функционер. А 66-годипниот Матис е пензиониран само две ипол години.

Матис, кој се пензионираше во 2013 година, технички не ги задоволуваше условите за новата должност, бидејќи притоа не бил цивил најмалку седум години. Тоа значи дека Конгресот во неговиот случај мора да направи исклучок, што не го сторил од 1950 година. Односно, Џејмс Матис е првиот поранешен генерал кој стана министер за одбрана по Џорџ Маршал во 1950 година во мандатот на претседателот Хари Труман.

Пензионираниот генерал изјави во сослушувањето пред сенатската комисија за вооружени сили дека Русија, Кина и исламските милитанти се најголемиот предизвик за „светскиот поредок од Втората светска војна“. Матис особено во сослушувањето ја потенцираше својата намера да развие стратегија за спротиставување на Русија.

Пензионираниот генерал Џемјс Матис, познат како „Бесното куче“, беше жесток критичар на политиката на актуелниот американски претседател Барак Обама на Блискиот исток, особено во однос на Иран. За Иран тој зборуваше како за „најголемата закана за стабилноста и мирот на Блискиот исток“.

Генералот Џејмс Матис учествувал во војните во Авганистан и во Ирак. Бил Врховен командант на здружените вооружени сили на НАТО за трансформација, началник на Заедничката команда на вооружените сили на САД, началник на Централната команда на американски војски. Матис отстапи од должностите и се пензионираше во 2013 година. Во политичките кругови е познат како ткн тврдолинијаш, кој за Русија смета дека има намера да го „растури НАТО“, а за Кина дека „игра на противречностите“ меѓу американските сојузници

Матис беше еден од „финалистите“ за оваа клучна позиција во следната американска администрација. Трамп вети дека ќе ја интензивира борбата против џихадистичката организација исламска држава во Сирија и во Ирак, двете боишта кои овој генерал добро ги познава.

Исто така пензионираниот генерал Џон Кели, поднесе оставка на челното месо на Јужната команда на американските вооружени сили во јануари 2016 година. Со тоа, тој ќе биде третиот човек во администрацијата на Трамп со генералски чин.

Служејќи во американската армија повеќе до 40 години, пензионираниот генерал на Маринскиот корпус, Кели е познат по своите критики на администрацијата на претседателот во заминување Барак Обама. Како челник на Јужната команда, под чија одговорност потпаѓа и злогласниот затвор Гвантанамо на Куба, тој жестоко се противеше на неговото затворање и според американските медиуми, дури и го попречувал остварувањето на ова ветување на Обама. Го критикуваше, исто така, и укинувањето на ограничувањето за жените за воена служба во сите родови на американската армија.

Во периодот 2008/2009 година, генералот Џон Кели командуваше со коалиционите сили предводени од САД во западен Ирак. Неговиот син, потполковникот Роберт Мајкл Кели, во 2010 година загина во Авганистан.

Министерството за национална безбедност е третото министерство по големина во САД, во кое се активни 240.000 службеници. Ова министерство, формирано по серијата терористички напади во САД во 2001 година, е одговорно за јавната безбедност, борбата со кибернетичкиот криминал, за предупредување и од природни катастрофи, а исто така и за проблемите со имиграцијата и за сигурност на границите./крај/мф/сн