Daily news
Собраниска драма: СДСМ бараат најстариот пратеник да ја превземе седницата?!
Веќе седми ден пратениците во Законодавниот дом преку меѓусебни реплики се надмудруваат и препукуваат кој е на страна на нардот. ВМРО ДПМНЕ и понатаму ја држи тезата дека треба да се дискутира за платформата, примената на јазикот и останатите прашања како што велат што ги договорил Заев.
Пратеникот Влатко Ѓорчев рече дека тие имале добра волја за конструктивно користење на собранската говорница, обвинувајќи ги СДСМ, дека преку нивните процедурални забелешки ја кочеле дебатата. „Од 184 процедурални забелешки 90 се на СДСМ, а останатите на сите други партии заедно. Кога во дискусиите прават одолговлекување СДСМ, тогаш никому ништо“,рече Ѓорчев.
Од СДСМ реагираа преку Дамјан Манчевски но и пратеничката од НСДП Соња Мираковска побараа претседавачот Трајко Вељаноски да овозможи седницата да трае по 18 часот, барајќи од Вељановски да се откаже од преседавањето на седницата, затоа што според нив немал капацитет.
„Господине Вељаноски, станете од оваа стол, и така пред вас се исуши цвеќето кое стои цела недела за ова седница која требаше да биде свечена.Дозволете да седне најстариот пратеник и да го заврши овој циркус“, рече Мираковска.
Во дискусијата се вклучи пратеницикот на Алијанса за Албанците Вејсел Мемети се обрати до пратениците од ВМРО-ДПМНЕ и рече дека ако граѓаните не гласале за платформата тогаш не гласале ниту за манифесот.
„Јас не видов никаков граѓански концепт во манифестот, за каков велите дека се залагате.Тој систем на Милошевиќ кој вие не сте го расчистиле во вашата партија не чини многу“, рече Мемеди.
Од време навреме, дофрлувањата и препукувањата, надвор од темата ги прекинуваше претседавачот Вељаноски, повикувајќи ги пратениците од ВМРО-ДПМНЕ да се откажат од реплики, но и до СДСМ од јавување за збор за процедурално.
„Еве таман тргна работата и од кај вас почнаа да се јавуваат за процедурално.Еден од вас почна да зборувате за кокошката и црвот и потоа на него се надоврзаа уште пет пратеници.средете си ги работите во вашите редови првин“, рече Вељаноски.
Собранскиот спикер се обиде да биде поостар, па во дискусијата го прекина пратеникот Драган Данев за процедурално, а зборуваше за нелојалноста на СДСМ. Карактеристично беше што на ова продолжение неколку пати и ја прочита точката која е на дневен ред. Инаку од 7 дена дебата до сега се исцрпени дискусиите за тројца од пријавени над 50 пратенци, најголем дел од ВМРО-ДПМНЕ./крај/мф/гд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.