Daily news
„Арс Ламина“ со изданија на Браево писмо
Денеска во Промотивниот центар на Саемот на книгата издавачката куќа „Арс Ламина – публикации“ ги претстави своите изданија отпечатени на Браево писмо, што претставува дел од соработката меѓу „Арс Ламина“ и Проектот на УСАИД И ЛЦИФ за деца со пречки во видот.
Изданијата се наменети за учениците со оштетен вид кои ги посетуваат дневните ресурсни центри, каде што децата со пречки во видот посетуваат дополнителни училишни часови.
„Досега се отпечатени 21 наслов на Браево писмо, меѓу кои: учебници по математика, природни науки и хемија, на македонски и на албански јазик, детски класици и бајки од Македонија“, изјави Бранка Бугариска, директор на издаваштво во „Арс Ламина“.
Пристапот до квалитетно образование е универзално човеково право. До 2014 година, помалку од еден процент од македонските деца со оштетен вид можеа да читаат Брајова азбука (систем за пишување што им овозможува на слепите и на лицата со делумно оштетен вид да читаат и да пишуваат со допир).
„Горди сме што со благодарение на ’Лајонс‘, УСАИД и Универзитетот на Југоисточна Европа и сите наши партнери, како што е ’Арс Ламина‘, успеавме преку овој благороден проект да ја смениме оваа реалност за лицата со оштетен вид во Македонија“, истакна Давор Каракашев, координатор на Проектот на ЛЦИФ и УСАИД за децата со пречки во видот.
Специјален гостин на промоцијата беше и Алдин Шерифи од Тетово, ученик во Државното училиште за рехабилитација за деца и младинци со оштетен вид „Димитар Влахов“ – Скопје, кој секојдневно го посетува ресурсниот центар во Тетово. Низ разговор, Алдин објасни како ги користи изданијата на Браево писмо и другите помагала и на кој начин тие му помагаат во совладувањето на наставните содржини, а на крајот на присутните им прочита извадок од „Бајки од Македонија“ на Браево писмо.
Во следната фаза, „Арс Ламина“ планира да издаде уште најмалку 50 наслови на Браево писмо – учебници, романи и книги за деца, лектирни изданија, класици, сликовници, дидактички игри и дополнителни дидактички помагала итн., а дел од нив ќе бидат изработени и издадени и во вид на аудиокниги. Се планира и отворање на посебно катче во книжарницата „Литература.мк“ во кое ќе можат да се најдат дел од изданијата на Браево писмо.
„’Арс Ламина‘ ја продолжува соработката во рамките на овој проект, а ќе продолжи и понатаму да обезбедува помош и поддршка во образованието секаде каде што е потребно, во рамките на своите можности. За децата со оштетен вид кои се веќе вклучени во редовниот образовен процес, ’Арс Ламина‘ и претходно ја даваше својата поддршка преку печатење учебници и помагала во специјални, зголемени формати, што потоа ги донираше до училиштата во кои овие деца ја посетуваат наставата“, додава Бугариска. крај/мф/сс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.