Изминативе денови Градот Скопје најостро ја осуди постапката на одредени неодговорни поединци или групи, за фрлање на отров и отровни материи, со цел на труење на бездомни животни, велат од Град Скопје.

„Оваа постапка е крајно неодговорна и претставува сериозна опасност по здравјето и животот на луѓето и животните, а воедно истото претставува и кривично дело. Сепак, денеска на протест на лица и здруженија на граѓани, овој собир се искористи за повторна манипулација на граѓаните, ширејќи лаги  и невистини за работењето на стационарот за бездомни животни „Вардариште““, велат од Град Скопје.

„Покрај овие фабрикувани и невистините обвинувања, навистина не знаеме зошто овие лица протестираат против работата на Град Скопје, која е единствена единица на локална самоуправа во Република Македонија која има хуман третман за бездомни кучиња“, додаваат од Град Скопје.

„Стационарот „Вардариште“ работи согласно сите законски прописи на Република Македонија и според сите одлуки донесени од страна на Советот на Град Скопје. Овој стационар работи професионално согласно принципите за хуман третман на животните – ЦНР програма (catch, neuter, release – “залови, стерилизирај, пушти“), осмислена од Светската асоцијација за заштита на животни (WSPA) и Кралското здружение за заштита на животните на Велика Британија (RSPCA). Оваа Програма е поддржана од Светската здравствена организација. (WHO), а одобрена од Советот на Град Скопје. Сите лица коишто работат во стационарот се вработени со поминати стручни обуки од страна на експерти од Кралското здружение за заштита на животните на Велика Британија (RSPCA), а истите секоја година доаѓаат во ненајавени инспекциски посети и досега немале забелешки за работата на стационарот за кои се обвинува од страна на учесниците на овој собир“, потенцираат од Град Скопје.

Од Град Скопје велат дека, за потсетување, од 2009-та година до сега:

– Капацитетот на стационарот „Вардариште“ е зголемен двојно. Објектот е изграден според европски стандарди и во него се сместени 48 нови боксови за сместување и хуман третман на заловените кучиња скитници.

– Боксовите се составени од дневна соба со димензии 1,5 метри на 1,5 метри (заградена со метална мрежа и врата) и спална соба со димензии 1,5 метри на 1,10 метри (изградена од бетонски блокови, а на предната страна има метална врата). Притоа се запазени соодветните комуникации што овозможуваат непречено движење и прием на кучиња.

– За проширување на стационарот „Вардариште“ Градот Скопје потроши околу 7 милиони денари.

– Набавени 10 кафези, јамки и мрежи за заловување, како и две сафари пушки. Се планира набавка на уште една сафари пушка. Новата опрема ќе придонесе за похуман начин на заловување и третман на уличните кучиња. За набавка на опремата се потрошени околу 5.000 евра.

– Градот Скопје и ЈП “Комунална Хигиена” ги поддржуваат сите активности за вдомување на бездомните животни.

„Апелираме до сите здруженија кои стојат зад протестот да и објаснат на јавноста, зошто кога поканивме поголем број на здруженија на средби со граѓаните за тие да им ја објаснат појавата на напади од страна на бездомни кучиња, истите во отсуство на било какви аргументи избегаа од средбите и соочување со граѓаните. На тие средби, се соочивте со гневот на граѓаните и месните заедници во Скопје, и по неколку средби престанавте да се појавувате на истите, без притоа да понудите ниту еден соодветен одговор и аргумент“, порачуваат од Град Скопје.

Градот Скопје, јавните претпријатија и сите органи кои произлегуваат од него, како и во минатото, така и во иднина ќе работат согласно сите позитивни прописи во Република Македонија. /крај/мф/бс