Daily news
Интересни факти за смртта
Иако не е многу ведра тема, смртта е нешто што не очекува сите нас.
А благодарејќи на фактите дека таа е една голема непознаница и дека луѓето генерално ја сметаат за посебно негативна, на бројни начини е табу тема во денешното општество. Не можеме да знаеме кога и како ќе ни се случи, не можеме да бидеме сто отсто сигурни ниту кога точно ќе се случи, но постојат некои факти поврзани со смртта кои ќе сакате да ги дознаете, а на едно место ги собра „Хафингтон Пост“.
Постои научно објаснување зошто на оној кој умира „животот му поминува пред очите“
Наместо мозокот да се „умртви“ пред смртта, се верува дека неговата активност поточно расте, предизвикувајќи состојба на зголемување на свеста. Тоа може да предизвика повеќе работи: или „пролетување на животот пред очите“ или „светлина на крајот од тунелот“, а се е потпомогнато со намалувањето на дотокот на крв и кислород во очите.
Телото не срами и откако ќе умреме
Најверојатно сте слушнале дека после смрта косата и ноктите продолжуваат да растат, но тоа баш не е вистина: всушност кожата се собира и открива поголема провршина на влакната и ноктите. Освен тоа, кога ќе умрете најверојатно телото ќе изврши една или две нужди, а зависно од полот, можеби и ејакулација. Тоа, секако се случува поради престанувањето на работата на мозокот кој повеќе не „држи се под контрола“. Ако сте маж и умрете завртени со телото кон долу, крвта почнува да се собира во деловите на телото најблиску до земајта па е можна ерекција.
А ако ве интересира колку е потребно да станете скелет: после неколку дена кожата може лесно да се отстрани, а после околу еден месец почнуваат да отпаѓаат забите, а и се друго.
Поблиску сме до бесмртноста отколку што веројатно мислиме
Calico е проект на Гугл на бесмртноста или поточно проект кој е фокусиран на здравството со посебен нагласок на истражување поврзано со процесот на стареење. Но, иако овој нивни старт -уп привлече најмногу внимание во медиумите, паралелно постои уште еден голем проект, а го води рускиот милијардер Дмитриј Исков. Тој е одлучен прашањето на бесмртноста да го реши до 2045 година и тоа така што ќе гради андроидни тела во кои вашиот мозок ќе може да биде преместен ако и кога на телото нешто му се случи или – остари.
Постои можност погрешно да сфаќаме кога некој е всушност мртов
Најверојатно сте слушнале за случаи кога некои луѓе се прогласени за „мртви“ па потоа „се вратиле во живот“. Всушност, токму за тоа е посветено едно ново големо истражување кое се занимава со можноста да имаме во целост неточен впечаток кога некој всушност е „мртов“: во некои случаи луѓето кои се „вратиле во живот“ можеле да го раскажат разговорот кој се водел покрај нив во моментите кога нивниот мозок не покажувал знаци на живот. Тоа научниците ги натерало да помислат дека не постои „момент на смртта“, туку дека тоа е процес кој се случува полека, додека се гасат некои поединечни функции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.