Daily news
Хојт Ји: Нападот на пратениците беше насилнички и кукавички
Заменикот помошник државен секретар на САД, Хојт Ји, го осуди нападот на пратениците во македонскиот Парламент, нарекувајќи го насилен и кукавички, а целиот настан несреќен и алармирачки.
Разликите во мислењата што ги имаат партиите околу владината програма,порача тој, треба да се решаваат низ расправа во Парламентот, почитувајќи го правото на мнозинството пратеници да решат кој ќе биде негов спикер.
„Ние силно ги осудуваме овие напади, бараме од властите да ги истражат,а одговорните да ги изнесат пред правдата. Веруваме дека политичките лидери треба да најдат решение за овој ќорсокак и начин мнозинството во Парламентот да предложи влада и владина програма“, порача Ји по средбите со сите политички лидери и претседателот Ѓорге Иванов.
Генерално тој не навести со што се обидел да ги убеди преставниците на ВМРО-ДПМНЕ да обезбедат мирен трансфер на власта, но соопшти дека во разговорите сите искажале разбирање за сериозноста на ситуацијата и за потребата да се излезе од политичкиот ќорсокак.
„Треба да го прашате самиот Никола Груевски за неговите намери. На средбите слушнав дека сите имаат разбирање за сериозноста на кризата, за потребата таа да се надмине и земјата да оди напред. Но, каква улога ќе одиграат лидерите поединечно во решавањето на кризата зависи од разговорите и преговорите меѓу партиите“, рече Ји.
САД, рече тој, се подготвени да им помогнат на оние што сакаат да ја постигнат таа цел и да ја приближат Македонија до ЕУ и НАТО, претходно нагласувајќи дека неговата и нашата земја се партнери, а партнерите имаат заеднички интереси и делат заеднички принципи кога решаваат конфликти.
„Важно е партнерите да сметаат еден на друг, да го остваруваат тоа на што се обврзале. Ние ги сметаме за одговорни за она што го велат и што го прават“, порача Ји.
Од она што го слушнал на средбите тој соопшти дека лидерите се залагале за демократска и за унитарна држава, за мирен трансфер и мирно решавање на конфликтот, како и за решение што е биде инклузивно и кое никого нема да остави настрана. Што значи тоа на обичен неполитички јазик не е јасно, но беше сосема јасна позицијата на САД околу изборот на Талат Џафери за претседател на Парламентот.
„Ние соопштивме јавно дека ќе работиме со новиот спикер на Парламентот, Талат Џафери. Истото го кажаа и ЕУ, НАТО и Берлин. Не сме единствени што сметаме дека на Џафери треба да му се даде секоја можност да го демонстрира своето лидерство и да го направи неопходниот чекор за да се формира влада“, рече Ји.
Со средбата претходно со Џафери во Парламентот, како прв странски функционер кој се сретнал со него како со нов спикер, тој го демонстрираше тоа најдиректно.
Генерално Ји нагласи дека е важно што ќе направи политичкото лидерство за завршување на кризата наредните денови, но дека став на САД е дека решение за кризата е создавање нова влада која ќе може да усвојува закони, да спроведува реформи и да исплаќа плати.
„Разбравме дека постои загриженост за владината програма. Во сите демократии тоа се дебатира во Парламентот “, беше рецептот на Ји за недоразбирањата околу Тиранската платформа.
Ји на средбата со лидерот на ВМРО-ДПМНЕ во Клубот на пратениците остана речиси два часа, а со останатите лидери по час и половина. Дека тоа што го слушнал од ВМРО-ДПМНЕ не мора да се оствари, се виде уште на прес конференцијата на која се појави еден од нивните американски медиумски перјаници, Кристофер Делисо, кој се обиде да го испровоцира Хојт Ји со прашањето „кој ви дал за право да доаѓате тука и да барате решенија“.
„Јас сум Хојт Ји, заменик помошни државен секретар на САД. Владата на САД е сериозна организација која работи според основните бирократски принципи, особено во односите со странските држави“, беше одговорот на Ји на Делисо.
Пораките на Ји беа во дебела дипломатска обланда, но од она што можеше да се сфати од понеделник ќе почне процесот на формирање влада, а САД веќе ја признаваат нејзината легитимност. с.ј./мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.