Daily news
Никола Димитров, новиот шеф на дипломатијата – човек за сите времиња
Преговарач за името, советник за национална безбедност, заменик-министер за надворешни работи и, конечно, шеф на дипломатијата. Никола Димитров е изборот на Зоран Заев на една од најважните функции во новата влада, која ќе се соочи со огромен број предизвици, меѓу кои и конечното одмрзнување на македонските евроинтеграции. Синот на пратеничката во првиот состав на Сорбанието, Ратка Димитрова, и Димитар Димитров, министерот за образование во првата експертска влада, повеќе од дваесет години умешно се снаоѓа во политичко-дипломатскиот лавиринт и веќе има завидна кариера зад себе.
Започна во Министерството за надворешни работи во 1996 година, како меѓународен адвокат за човекови права во времето на СДСМ. Само две години подоцна со победата на ВМРО-ДПМНЕ неговиот татко Димитар станува министер за култура, а Никола Димитров е унапреден во заменик-министер за надворешни работи. Кратко време потоа стана советник за национална безбедност во кабинетот на претседателот Борис Трајковски, а во 2001 година владата на Љубчо Георгиевски го испраќа на исклучително престижна функција како амбасадор во Соединетите Американски Држави, еден од најмладите во историјата. Истовремено неговиот татко Димитар Димитров е амбасадор во Москва.
Во 2006 година, кога ВМРО-ДПМНЕ повторно доаѓа на власт, Никола Димитров добива нова функција како советник за национална безбедност на Никола Груевски. Три години подоцна повторно станува амбасадор, овој пат во Холандија, каде службува сè до 2013 година. Во целиот овој период младиот дипломат ревносно ги извршува сите задачи кои му се наложени од претпоставените, не ја критикува владата и не се конфронтира со водството на ВМРО-ДПМНЕ. Сепак, во 2014 година ја одбива понудата да стане амбасадор во Русија, се вработува во Хашкиот институт за глобална правда и почнува отворено да зборува против политиките на Никола Груевски и неговите најблиски соработници. Пролетта 2015 година, во екот на „бомбите” од страна на опозицијата, заедно со Владимир Лазаревиќ и Перо Димшовски, исто така некогашни функционери во владата на Груевски, ја формираат „Амстердамска тројка” која бара реформи во ВМРО-ДПМНЕ и го повикува членството да му се спротивстави на Груевски.
– Го повикуваме членовите, симпатизерите и поддржувачите на ВМРО-ДПМНЕ да исправат глава и да се одважат да кажат не. Товарот на сегашното раководство и одговорноста за нивните постапки мора да го сноси сегашното раководство. Ние сме должни да го преземеме нанесениот срам врз државата и врз партијата и да разговараме со опозицијата со чиста совест, пишува во тоа време Димитров.
„Амстердамската тројка“ наскоро исчезнува од јавноста, а Димитров, кој во меѓувреме беше изложен на остри напади и потсмев од провладините медиуми, преминува во редовите на опозицијата. Во екот на „Шарената револуција“ често се враќаше во татковината, пишуваше антивладини колумни и во неколку наврати држеше говори на протестите во Скопје. По изборите на 11 декември неговото име сè почесто се спомнуваше како можен избор за министер за надворешни работи, што се потврди кога Заев официјално го избра за нов шеф на дипломатијата.
Никола Димитров има завршено Правен факултет во Скопје, на Универзитетот Св. Кирил и Методиј, а магистрираше меѓународно право на Универзитетот во Кембриџ. Оженет е и има три деца.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.