Daily news
Кои се новите заменици-министри во Владата?
За заменик-министер во Министерството за одбрана е предложeн Беким Максути. Дипломирал на Воената академија, магистер по мир и развој и доктор на науки по безбедност. Заменик-министер во Министерството за внатрешни работи ќе биде Агим Нухиу, доктор на правни науки. Беше министер во Министерството за внатрешни работи до конституирањето на новата Влада, претходно бил заменик-министер, и продекан за наука на Правниот факултет при Државен универзитет во Тетово.
Во Министерството за правда заменик на министерот ќe биде Оливер Ристовски. Во 1990 година по положување на правосудниот испит формирал адвокатската канцеларија во која активно работи до денес и во која има ангажирано адвокати и адвокатски приправници. За заменик на министерот во Министерството за надворешни работи е предложена Арта Точи, доктор на лингвистички науки на Универзитетот на Југоистична Европа. Работела како професорка по англиски јазик и како лекторка.
За заменик на министерот во Министерството за финансии е предложена Ширете Елези, која беше поранешна министерка во Министерството за локална самоуправа. Кире Наумов е предложен за заменик на министерот во Министерството за економија. Повеќе од 20 години е вклучен во економските прашања поврзани со јавниот долг и јавните финансии. Беше дополнителен заменик-министер за финансии во Владата за спроведување на изборите во 2016.
Дипломираниот инженер агроном Власте Димковиќ е предложен за заменик на министерот во Министерството за земјоделство, шумарство и водостопанство. Бил градоначалник на општината Старо Нагоричане во периодот од 2000-2009 година. За заменик во Министерството за здравство е предложен д-р Гоце Чакаровски, специјалист по гинекологија и акушерство, за заменик на министерот во Министерството за образование и наука е предложен докторот по физичка култура, Висар Гани, а за заменик на министерот во Министерството за труд и социјална политика е предложен д-р Елми Азири, доцент по економија.
Во Министерството за локална самоуправа заменик ќе биде Дејан Павлески. Бил посебен советник на дополнителниот заменик-министер, а во Министерство за култура бил соработник за информатичка и комуникациска технологија. За заменик на министерот во Министерството за култура е предложен Владимир Лазовски, професионален актер во Театарот за деца и младинци. За заменик на министерот во Министерството за информатичко општество и администрација е предложен Александар Бајдевски, дипломиран економист. Работел во Министерството како помлад соработник во Секторот за финансиски прашања. Бил и помлад соработник во Генералниот секретаријат на Владата.
Заменик-министер во Министерството за транспорт и врски ќе биде Ремзи Мехмеди, магистер по правни науки. Бил соработник-асистент по право на Правниот факултет на Државниот универзитет во Тетово, а работел и во Државниот завод за геодетски работи во Кичево. За заменик на министерот во Министерството за животна средина и просторно планирање е предложен Јани Макрадули, магистер по компјутерски науки, потпретседател на Собранието на Република Македонија и поранешен асистент на Електротехничкиот факултет во Скопје.
ВМ
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.