Daily news
Како изгледал животот пред вакцините?
Противниците на вакцинацијата, чиј растечки број ширум светот за последица има низа епидемии на болести кои благодарение на добрата вакцинација на популацијата се сметаа речиси за исчезнати, заговараат свет во кој никој нема да ги вакцинира нивните деца. Во нивните мозоци вакцините се отровни, опасни и можат да предизвикаат тешки невролошки болести.
Притоа, забораваат дека не толку одамна сме живееле токму во таков свет и тоа од многу едноставна причина, вакцинацијата каква што ја познаваме денес едноставно не постоела. И поради тоа, да погледнеме како изгледал животот во Хрватска, но и во светот, без вакцинации.
Иако противниците на вакцинаците сипаниците ги сметаат за безопасна болест, треба да се потсетат дека во време пред вакцинацијата за сипаници во САД стотици луѓе умирале од компликации кои се поврзуваат за оваа болест (како што е енцефалитис, воспаление на мозочните клетки). Инаку, енцефалитис се јавува околу во еден на 1000 случаи на сипаници, а секој 3000 заболен од сипаници умира од компликации. Тоа денес можеби не звучи страшно, но треба да се знае дека пред почетокот на масовната вакцинација речиси секое лице во САД боледувало од сипаници. Покрај тоа, околу пет отсто деца со сипаници добиваат воспаление на белите дробови, а таа ни во денешно време никако не може да се смета за безопасна болест.
Според податоците на американскиот Центар за контрола на болести ЦДЦ, во епидемијата на рубеола во 1964-65 година се разболеле 12,5 милиони Американци, од кои умреле 2000 бебиња, а забележани се и 11.000 спонтани абортуси. За споредба, во 2012 година, по вакцинација на популацијата, во САД се забележани само девет случаи на рубеола. Ако се присетиме на потешките болести, како дифтерија, треба да се истакне дека од оваа болест само во 1921 година во САД умреле околу 15.000 луѓе. По спроведеното масовно вакцинирање дифтеријата речиси целосно исчезнала и од 2004 до денес во САД е забележан само еден единствен случај со оваа болест. Да потсетиме, дифтеријата може да предизвика невритис и миокардитис, а во случај на развој на компликации смртноста е од 5 до 10 отсто.
Каква била состојбата во Хрватска пред спроведување на програмата за масовна вакцинација на населението? На пример, од дифтерија во Хрватска пред воведување на вакцинацијата годишно умирале сто лица, а од компликации поврзани со сипаниците умреле десетици деца годишно. Од тетанус на пример пред вакцинациите, секоја година умирале неколку десетици работно активни лица. Од детска парализа, болест која била речиси искоренета со употреба на вакцини, годишно исто така умирале десетици деца, а исто толку од нив развивале траен инвалидитет.
Во прегледите на Хрватскиот завод за јавно здравстгво ХЗЈЗ може да се видат графикони кои јасно покажуваат колку ефективната вакцинација ги искоренила тешките болести во Хрватска. Во уште еден преглед се претставени сите нус-појави на вакцинациите забележани во 2012 година, а кои покажуваат колку се безбедни современите вакцини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.