Daily news
(ВИДЕО) Карло Ромео: Трст ќе биде нов моментум за Балканот
Италијанскиот амбасадор Карло Ромео во интервју за „Макфакс“ најави дека на самитот во Трст, што ќе се одржи идната недела, Македонија треба да добие европска финансиска поддршка за голем проект, што претходно не поминал во Париз. Тој не сакаше однапред да соопшти за каков проект станува збор, но рече тоа е нешто на што амбасадата и Италија работеле подолг период за да се оствари.
Според амбасадорот Ромео, вредноста на проектите што ќе бидат одобрени за реализација во Трст ќе биде над 150 милиони евра. На самитот, на кој ќе учествуваат лидерите на Германија, Ангела Меркел, на Франција Франсоа Макрон, на Италија Паоло Џентилони и веројатно на Австрија, ќе биде формирана Регионална стопанска комора со седиште во Трст и, по осум години тешки преговори, ќе се потпише договорот за создавање Транспортна заедница на Западниот Балкан.
Околу идејата за заеднички пазар на Западниот Балкан, што ја промовираше еврокомесарот Јоханес Хан а јавно ја одбија некои од лидерите во регионот бидејќи ја сфатија како компензација за членство во Унијата, Ромео практично одговори дека не била сфатена на позитивен начин и дека ќе се деноминира како регионална економска област.
„Разбравме дека оваа дефиниција за заеднички пазар испровоцира негативни реакции. Берлинскиот процес не е цел за себе, туку клучен инструмент за олеснување на пристапот на балканските земји кон ЕУ. Тоа е неговата стартегиска цел, да му даде повеќе енергија на процесот. Тој треба да ја помогне регионалната соработка и прифаќањето на европските регулативи. Идејата не беше создавање заеднички пазар туку повеќе интеграција меѓу балканските земји“, одговори Ромео. Притоа тој најави дека во Трст, паралелно со самитот ќе се одржи и економски форум на кој ќе учествуваат над 500 компании од Италија и од Балканот. Тој најоптимистички оцени дека Трст ќе биде нова страница и нов моментум за шестте земји од регионот.
За предлогот на германскиот шеф на дипломатијата, Зигмар Габриел, за зголемување на помошта за Балканот преку пакет што тој го нарече „Берлин плус“, амбасадорот Ромео рече дека нема информација дека тој ќе биде објавен во Трст. Станува збор, оцени тој, за германска идеја која се уште е на инцијално ниво и по се изгледа се чека да поминат изборите во Германија, за да биде формализирана.
Првпат на самитот во Трст,на барање на Италија, ќе се расправа и за борбата против корупцијата, поради оценката дека ова прашање е клучно за општествата во регионот. Под покровителство на италијанската анти-корупциска агенција ќе биде формирана мрежа за соработка на ваквите антикорупциски тела во регионот, што ќе опфати размена на знаења, помош за законската регулатива, студиски посети и подобрување на способноста за нивна реакција.
Амбасадорот проговори и за најновиот потег на ВМРО-ДПМНЕ во Парламентот, т.е. формирањето десет место една парламентарна група, што во јавноста се сфати како јасна најава за правење опструкции во законодавното тело.
„Важно е тоа што се прави да биде на линија со законската регулатива, да биде во законската рамка. Во овој посебен момент, кога земјата треба да ги финализира важните реформи, потребно е да има што повеќе консензус меѓу власта и опозицијата. Поради предизвиците со кои се соочува Македонија, што се толку многу големи, ви треба национална кохезија . Знам дека е тешко да се постигне таа, но важно е опозицијата да биде инволвирана во реформите на Владата.
Од самиот почеток, кога дојдов тука, забележав дека сите зборуваат за ЕУ и НАТО како стратегиски цели на Македонија. Ниту една политичка партија не вели – ние сме против. Иако има различни мислења како да се постигнат реформите, на крајот на денот заеднички интерес на сите граѓани е приклучувањето кон НАТО и ЕУ. Знам дека е полесно да се каже тоа отколку да се оствари и дека борбата во Парламентот може да биде тешка. Дури и во мојата земја, Италија, нивото на политички поделби некогаш е многу големо. Но, очекувам барем за главните прашања и предизвици да има заеднички пристап“, порача Ромео.
За информацијата дека Владата решила да го преиспита тендерот за изградба на Клиничкиот центар, вреден 72 милиони евра, што го доби конзорциум предводен од италијанската компанија ИНСО Системи, Ромео вели дека според неговите сознанија, одлуката не е конечна.
„Немам прецизна информација. Колку што разбрав, Владата се уште не решила што да прави со договорот за Клиничкиот центар. Постои идеја тој да биде ревидиран, но не сум сигурен дека има финална одлука. Затоа, ќе ја чекаме одлуката на Владата.
Инвестициите на италијанските компании се важен дел од задачите на амбасадата, така што ќе ги следиме настаните околу ова можно инвестирање. ИНСО е многу искусна компанија на меѓународно ниво и со многу искуство и во регионот. Веќе има работено на проекти во Грција, во Србија, во Бугарија…Има добар капацитет, добро знаење и добра репутација, а покрај тоа во конзорциумот што треба да работи на Клиничкиот центар треба да влезат две големи македонски компании. Целиот процес околу овој проект исто така ќе биде анализиран од европските финансиски институции, бидејќи сретствата за него се од банка на Советот на Европа. Затоа се надевам дека одлуката за тендерот ќе биде потврдена“, порача амбасадорот на Италија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.