На вчерашната јавна расправа во Охрид за влијанието на животната средина на проектот за изграба на интегриран систем за управување со цврст отпад во Југозападниот Плански Регион, селото Годивје, во општина Дебарца, беше неведено како најсоодветна локација за изградба на регионална депонија во Југозападниот Плански Пегион.

Во него спаѓаат и општините Охрид и Струга, а зафатот треба да се реализира со средства од ИПА-фондовите.

И покрај тврдењата дека оваа инсталација ќе биде изградена според највисоки еколошки стандарди, со линија за селекција на отпадот кој ќе биде третиран и од него ќе се произведува биогас, а само дел ќе биде депониран, се јавија првите реакции и противења.

Први реагираа екологистите уште во текот на јавната расправа.

„Во случај на хаварија на депонијата, што постои можност да се случи, може да има големи штети и загадувања на водата во Охридското Езеро, а со тоа и на животинскиот и на растителниот свет. Ме чуди зошто во сливот на Охридското Езеро, зошто не се префрли преку Пресека или да се избере некоја локација во реоните што не се во сливот на Охридското Езеро, како Дебар, на пример, или по течението на Дрим, каде што не може да се загрози езерото“, се спротивстави д-р Трајче Талевски, експерт по животна средина.

Со реакција се јавија и советниците од СДСМ во Општина Дебарца, со констацијата дека нивната општина е најмала по број на жители во Југозападниот Плански Регион и е најмал создавач на отпад, а таа треба да ги трпи последиците.

„Во врска со одржаната јавна расправа по студијата за влијанието на интегрираниот систем за управување со отпад во Југозападниот Плански Регион врз животната средина, на која како најсоодветна локација за изградба на регионалната депонија беше посочена локацијата во атарот на селото Годивје, Дебарца, како советничка група на СДСМ во Советот на Општината Дебарца го поздравуваме секој проект што е во правец на решавање на проблемите со управувањето со отпадот на регионално ниво, но сметаме дека посочувањето на Дебарца како локација за изградба на регионалната депонија во најмала рака е несреќна замисла, несоодветна и неприфатлива од повеќе причини, се вели во соопштението на СДСМ за Дебарца.

Тие додаваат дека се работи за локација што се наоѓа во чиста, здрава животна средина и недопрена природа, односно целокупната област на Дебарца претставува своевиден споменик на природата.

Второ, избраната локација се наоѓа во сливот на Охридското Езеро, кое е заштитено од УНЕСКО и во случај на хаварија на инсталацијата, која и покрај ветувањето дека ќе биде изградена според највисоки еколошки стандарди, постои можност да се случи, може да доведе до големи штетни последици врз животинскиот и растителниот свет во сливното подрачје и во самото Охридско Езеро.

Трето, локацијата е во непосредна близина на важната сообраќајна артерија од Коридорот 8, автопатот А2 и изградбата на инсталацијата на таа локација е спротивно на еколошките стандарди пропишани со националното законодавство и директивите за животната средина на ЕУ.

Советниците побараа од градоначалникот на општина Дебарца јавно да се изјасни и да ја отфрли оваа иницијатива, а претседателот на Советот на Општината свика седница на Советот на која советниците ќе се изјаснат по иницијативата.

„Бараме по иницијативата да се изјасни и стручната и заинтересираната јавност од Дебарца и другите засегнати општини од регионот.
Крајно, ако е потребно, ќе побараме по иницијативата да се изјаснат и граѓаните на Дебарца преку облиците на граѓанско изјаснување во согласност со Законот за локалната самоуправа и Статутот на Општина Дебрца“, се вели во соопштението.