Daily news
Дали јагленот и петролеј можат да излечат сида и рак
– Добар ден, дали сте дале оглас за продажба на лек против тумори, цисти, мозочни и срцеви удари?
– Да, еве имам уште две шишенца.
– Прво кажете ми, од што е тој лек? Имате ли некоја документација која го потврдува сето ова што го пишува во огласот, дека ги лечи сите овие наведени болести? Имате ли дозвола за продажба?
– Ма нема што да ти зборувам, каква документација, еве ти мој пример: јас го имав најлошото и се излечив. Докторите не ми веруваа кога отидов на контрола.
– Добро, но од што е направен лекот? Дали е по ваш рецепт?
– Јас го купив од една жена од Велика Кладуша и сега јас тоа го продавам. Тука има алое вера и уште нешто, не знам точно. Главно се пие од една капка до 15 па наназад, па потоа по 25 капки три пати на ден… Цената на едно шишенце е 100 (конвертибилни) марки (50 евра)…
Вака течеше разговорот со извесна Дина, која преку продажната интернетска страница pik.ba понудила „еликсир на животот‟. Во „описот на производот‟ напишала дека, освен наведеното, лечи и притисок, триглицериди, штитна жлезда, маснотии во крвта и сите женски болести.
Рецепти за сите болести
На истиот портал, под рубриката „здравје‟ се продава и лек „кој уништува туморозни клетки за 60 дена‟, „лек против рак‟, „рецепти за сите болести‟, како и „книга за употреба на ММС т.е. чудотворен минерален напиток‟ (од Miracle Mineral Solution) кој наводно лечи сида, рак, аутизам и многу други болести.
Токму тој последен препарат во Србија овие денови предизвика вистинска полемика, а откако тамошните лекари објавија дека лекот всушност содржи средство за дезинфекција на нехлорирана вода и избелувач кој се користи во домаќинствата и дека може да има фатални последици за тие кои го користат, почнувајќи од оштетување на дишните патишта и системот за варење, потоа пликови, па се до смрт.
Покрај сето тоа, дистрибутерите во Србија тврдат дека првите количини на тој препарат ги набавиле во Босна и Херцеговина, од Слободан Масилиќ од Босански Шамац, а кој се претставувал како лекар по природна медицина и хемиски инжинер.
И навистина, Маслиќ има своја интернетска страница под името „Природна медицина‟, но на неа повеќе го нема спорниот производ. Всушност, тој својата веб страница речиси ја затворил.
Неговиот последен пост е од февруари оваа година, а меѓу понудените „лекови‟ повеќе го нема ММС, но има прав од јаглен и петролеј, опишан како „лек против рак, на кој единствена маана му е што е евтин‟.
Во текстот за петролејот, со илустрирана фотографија со шише и етикета на која пишува: „Петролеј за осветлување‟, има неколку примери за наводно излекувани разни видови на рак: едно семејство од Шварц од Берлин, медицинска сестра од Сремски Карловци… Под текстот е и едно прашање, кое го поставил извесен Лека, а кој прашува: „Дали постои некој кој моментално го користи петролејот и може да посведочи за неговата делотворност? Нека се јави, нека прозбори, да помогне и на другите…‟
Иако прашањето е поставено пред цели две години, на него никој не одговорил.
Настанокот на чудотворниот напиток
Сараевскиот хирург Ибрахим Церо смета дека лечењето со препарати кои не поминале процедура на клиничко испитување и регистрација од надлежната агенција за лекови отвара можност не само за злоупотреба, туку и за штетни ефекти по здравјето на луѓето.
За наведените препарати кои се нудат преку слободна продажба на интернет вели дека немаат никаква ни експериментална, а ни научна студија која би ги потврдила наводните позитивни ефекти кај одредени болести, па истакнува дека се можни разни нуспојави, како и трајни штетни последици по здравјето на нивните конзументи.
За сето тоа сакавме да разговараме со Слободан Маслиќ, сопственик на сајтот „Природна медицина‟ и да го прашаме дали неговите наводни лекови поминале анализи, имаат ли дозвола за продажба и зошто од содржината го потенцирал „чудотворниот напиток ММС‟, па се јавувавме на сите понудени броеви на страницата. Меѓутоа, сите кои се јавија рекоа дека тоа не е број на Слободан Маслиќ, дека тие не продаваат никакви лекови, не знаат што е ММС; ниту имаат нешто со тоа. А многу брзо се откри дека „ништо со тоа‟ немаат ни многу државни, ентитетски и општински институции во државата.
Тијана Спасојевиќ, портпарол на Агенцијата за лекови и медицински средства во БиХ, рече дека, според ентитетските закони за аптекарска дејност, продажба на лекови преку интернет е забранета. Кога се работи за поединечни продажби преку интернет, вели дека тие напитоци не спаѓаат во лекови, ниту се регистрирани како такви. „Со промет на лекови на мало можат да се занимаваат само аптеки на кои ентитетските министерства се надлежни за дејностите за здравје и тие ги издаваат дозволите. Физички лица и нелиценцирани установи не можат да се занимаваат со тоа и таков промет е нелегален‟.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.