Daily news
„Вечерње новости“: Заев режира немири во граничната зона меѓу Македонија и Србија
Српските разузнавачки служби дошле до сознанија дека се подготвува уфрлање на добро вооружена група Албанци од Косово во граничната зона помеѓу Србија и Македонија, пишува „Вечерње новости“.
Медиумите блиски до српската власт оваа информација ја пренесуваат како медиумска бомба која наводно ги разоткривала плановите на премиерот Зоран Заев за пронаоѓање на виновници за проблемите во Македонија. Пропагандната машинерија во српските медиуми се засили по смената на власта во Македонија. Следува дел од таканаречените најави за конфликт на провладините српски медиуми.
“Тие наводно би требало да бидат облечени во униформи на српски специјални полициски и воени единици, а нивна задача би била на непристапните делови ја преминат македонската граница.
Оперативците известија дека оваа група според сценариото би била снимена што би довело до дипломатска војна помеѓу двете земји, а на Скопје тоа би му користело како адут Србија да ја обвини за кршење на суверенитетот, сокривање оружје и организирање вооружен бунт на територија на соседна држава“, пишува Вечерње новости.
-Планот до кој дојдоа нашите безбедности структури, а кој е познат и на одредени носители на државни функции во Скопје, подразбира обинување на Србија и нејзиното раководство дека имаат територијални претензии кон јужниот сосед и дека работат на дестабилизиација и делење на македонската територија.
Вториот дел од акцијата на компромитирање на Србија и нејзините државни органи би се одиграл преку шпионска афера која би била отворена со “спектакуларна“ акција на апсење на измислена српска мрежа на агенти во Македонија. Ова сценарио подразбира приведување на поранешни пензионирани припадници на службата за безбедност од ЈНА кои останале во Македонија.
Според весникот, иако премиерот Зоран Заев по средбата со српскиот претседател Александар Вучиќ кажал дека се надиминати сите несогласувања, сепак безбедносните информации укажувале дека македонскиот државен врв има интерес да отвори нов пакет на обвинувања на сметка на Србија.
-Зад сето ова стои албанскиот притисок врз македонската влада и посебно очекувањата пред дијалогот на Србија со Косово но и поради отворањето на прашањето за членство на Косово во УНЕСКО.
-Се заканува реална опасност од загрозување на српско-македонските односи, со оглед дека тие во изминатите неколку месеци се сериозно нарушени, наведува Вечење новости.
Македонија и Србија неколку месеци наназад имаат влошени односи откако контраверзниот министер за надворешни работи Ивица Дачиќ во неколку наврати изјави дека Србија згрешила што ја призна Македонија под уставното име, со оглед дека земјава го признала Косово и гласала за влез на Приштина во УНЕСКО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.