Daily news
СЈО: Катица Јанева преслушала 70 отсто од бомбите – прават форензичка анализа за предметот за Чауш и за Љупчо Палевски
За последните шест месеци тимот на Катица Јнавеа поднесе 18 обвиненија за 19 предмети против 120 лица за 168 кривични дела, напиша специјалната јавна обвинителка во извештајот за работата на СЈО. Во текот на извештајниот период отворени се 7 нови истражни постапки против 25 физички и преземени се истражни дејства за 4 правни лица. Јанева пишува дека е особено важно мислењето на Апелациониот суд од Скопје за бомбите како доказ во судската постапка. Oд Судот во прв степен не е определена ниту една од побараните мерки притвор, пишува Јанева. Најмногу кривични дела се за злоупотреба на службената положба и овластување, дури 77, и злосторничко здружување – 26.
Во извештајниот период почнале 142 нови предистражни предмета. Од нив, 49 предмети се формирани по сопствена иницијатива, а 93 се формирани врз основа на пријави од други подносители. Вклучувајќи ги претходно отворените 50 активни предистражни постапки во ова јавно обвинителство, во моментот во работа се 99 активни предистражни постапки. СЈО ги анализира форензичките копии од предметот против Захир Бекири – Чауш и Имер Бекири доставен од страна на Основното јавно обвинителство Скопје, при што утврдени се повеќе од 80.000 аудиофајлови за кои веќе се анализира колкав е бројот на телефонски разговори кои се предмет на незаконското следење на комуникациите.
„Од одземените предмети при извршениот претрес, кај едно лице во рамките на една предистражна постапка во извештајниот период при анализа на форензичките копии утврдени се повеќе од 15.000 аудиофајлови на кои во моментот се врши обработка во насока на утврдување колкав е бројот на телефонски разговори кои се предмет на незаконското следење на комуникациите. Укажувам дека за оваа предистражна постапка сè уште во тек е форензичка анализа на одземените предмети, така што презентираната бројка не е конечна“, пишува во извештајот. Јанева пишува дека од отворањето на истражната постапка во предметот познат во јавноста како „Таргет“ поднесени се 716 барања од граѓани за проверка на 1.976 телефонски броеви.
„Во рамките на четвртиот извештаен период, во одредена мера е надминат дел од опструкциите на кои посочив во претходните извештаи. Во оваа смисла кон крајот на овој извештаен период беше видливо дека повеќето од институциите почнаа да покажуваат подготвеност за соработка со ова јавно обвинителство, како и нивна подготвеност за постапување во рамките на законски пропишаните обврски. Вака подобрената соработка очекувам да продолжи имајќи предвид дека во претстојниот период е предвидено преземање голем број процесни дејства во рамките на отворените предистражни постапки“, напиша Јанева.
Специјалната обвинителка верува дека во претстојниот период, а во што е можно покус рок, ќе се изнајде соодветно законско решение со кое ќе се регулира правната положба на специјалното јавно обвинителство за обезбедување законски механизми и отстранување сите пречки со цел да му се овозможи на ова јавно обвинителство до крај да ги истражи кривичните дела кои се во негова надлежност. „Пред сè, имајќи го предвид јавниот интерес, се надевам дека законските измени кои се во тек ќе влијаат на овозможување правна еднаквост на сите сторители на кривични дела и со донесување соодветни законски решенија да се отстранат пречките во работата на ова јавно обвинителство, а воедно ќе се овозможи негово непречено постапување и исполнување на законските надлежности“, напиша Јанева во извештајот.
В. Маглешов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.