Daily news
АБА: Победнички старт на МЗТ, Партизан падна во „Јане Сандански“
МЗТ со победа ја започна новата сезона во регионалната АБА лига. Вечерва во СЦ „Јане Сандански“, кошаркарите на МЗТ го совладаа белградски Партизан со 92:89 (26:25, 16:23, 21:19, 29:22). „Штрковите“ до победата ги предвода Дамјан Стојановски, Бојан Трајковски и Ерик Гасија, кои постигнаа две третини од поените.
МЗТ на брилијантен ја започна својата шеста сезона во Јадранската лига, со победа над еден од фаворитите за пласман на завршниот турнир.
Кошаркарите на македонскиот шампион од првата секунда покажаа дека немаат намера да им се повтори минатосезонскиот дебакл против Партизан.
Одлично во првите шест минути функционираше пик играта помеѓу Гарсија и Лалиќ за која Паризан немаше решение. МЗТ по шест минути имаше предност 21:14. По тајм аутот на Мута Николиќ, Партизан почна добро да ја брани пик играта, МЗТ влезе во серија грешки и избрзани шутеви, што иницираше серија од десет поени на и водство на белградскиот тим. Сепак во финишот на првиот период Трајковски погоди тројка за 26:25.
Партизан добриот ритам го пренесе и во втората четвртина, а влегувањето во игра на искусниот капитен Величковиќ му донесе дополнителна агресивност под обрачите. Екипите беа во егал по 15 минути игра (32:32), но во следните три минути гостите направија серија 2:12 и стигнаа до првата двоцифрена предност на мечот 34:44.
Следуваше тројка на Стојановски, па потоа истиот играч реализира три слободни фралања, а Вилијам-Гос од линијата за слободни се погреижи Партизан на полувреме да води 42:48.
Во второто полувреме двата тима тргнаа лошо, со многу промашувања и загубени топки, но Партизан успеваше да ја одржува разликата од четири до осум поени. Гостинскиот центар Шалиќ блескаше во овој период, во кој постигна седум од своите девет поени. Предноста на Партизан по три четвртини беше 63:67.
МЗТ решавачкиот период го отвори со серија од пет поени (68:67), во 33.минута беше 70:70, а во наредната минута се случи еден од клучните моменти на натпреварот. Трајковски со блокада го спречи Величковиќ да поентира од контранапад, а потоа центарот на МЗТ на спротивната страна реализира за три поени.
Во последните седум минути целосно се разигра капитенот Стојановски, Трајковски погодуваше секогаш кога тоа му беше неопходно на тимот, а во пенал завршницата Дамјан Стојановски го реши прашањето на победникот.
Покрај двајцата македонски репрезентативци брилијантен меч одигра новиот плејмејкер Гарсија кој подели девет асистенции, а статистички кога тој беше на теренот МЗТ беше во плус од 19 поени.
На крајот најефикасни кај МЗТ беа Стојановски со 25 поени, 5 скока, 4 асистенции, Трајковски со 20 поени, 14 скокови и Гарсија со 17 поени, 9 асистенции. Двоцифрени според бројот на поените кај МЗТ беа уште и Јансен со 14, односно Лалиќ со 10 поени.
Партизан го предводеа капитенот Величковиќ со 16 поени, односно Вилијам-Гос со 12 поени и 10 асистенции, но Американецот лошо шутираше од поле 3/13.
Мечот од второто коло МЗТ ќе го одигра веќе во вторник, кога ќе му гостува во Белград на ФМП. н.ц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.