Daily news
Заев: Чаир е сликата на Македонија – како ќе се однесува Чаир, така ќе се однесува целата држава
Претседателот на СДСМ, Зоран Заев, денеска имаше средба со жителите на општина Чаир, кои им изразија поддршка на акцијата за живот и на концептот едно општество за сите.
„Чаир е слика на нашата мултиетничка Македонија. Како ќе се однесува Чаир, така ќе се однесува и Македонија. Ве повикувам со сите наши различности, овде живеат Албанци, Македонци, Турци, Роми, Бошњаци, Власи, Срби… сите етнички заедници. За мене е важно и како политичар какви пораки ќе излезат овде од Чаир. А јас не очекувам ништо помалку, освен пораки на единство, сплотеност и верба кон заедничката добра перспектива, исти за сите граѓани на нашата заедничка Република Македонија“, порача Заев.
Претседателот на СДСМ побара поддршка за досегашниот пратеник и кандидат за градоначалник на Скопје, Петре Шилегов.
„Тој е човек што си го сака Скопје и кој сака еднакво да се развива. Да нема приоритетни општини и такви што се последни во плановите на градот. Имаме намера градот рамноправно да се развива затоа што градот е за сите граѓани што живеат на неговата територијата. Јас сум среќен што можам денеска да побарам поддршка од вас за човек за кој сум убеден дека ќе работи јуначки за интересот на сите граѓани на Скопје. А јас ќе го имам задоволството да го поддржам со сета сила и како премиер, и како Влада и како човек“, рече претседателот Заев.
Тој искажа поддршка и за кандидатот за градоначалник на општина Чаир, Висар Ганиу, од ДУИ.
„Тој е пријател со сите нас, човек што верува во единството и сплотеноста на нашиот народ. Човек што ќе им служи еднакво на сите. Човек што има прекрасни идеи за развој на целиот Чаир онаков каков што сите сакаме да го видиме“, порача претседателот на СДСМ.
Заев најави силна поддршка од Владата за низа инфраструкурни проекти, изградба на водовод, атмосферска и фекална канализација, посочувајќи го примерот со населбата Серава која се соочува со сериозни инфраструктурни проблеми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.