Daily news
(ВИДЕО) Стојановски: Спомениците на СДС се згаснати погони и тешки судбини на стотици илјади граѓани
Поранешната фабрика „Годел“ е едно од повеќето места каде што е извршен масакр врз македонската економија во 90-тите години на минатиот век од страна на СДС и криминалната тајфа блиска до власта во тоа време, порача Боби Стојановски од ВМРО-ДПМНЕ.
„Спомениците и делата на ВМРО-ДПМНЕ се видливи и носат бенефит за граѓаните, а спомениците на СДС се згаснати погони и тешки судбини на стотици илјади граѓани кои останаа без работа додека СДС беше на власт. „Годел“ беше затворен поради неодговорните политики на СДС. Со затворањето на „Годел“ згаснаа 1.900 работни места. Да, почитувани граѓани, 1.900 семејства останаа без работа поради неодговорните политики на СДС.
„Просториите зад нас сведочат за едно матно време во кое беа затворени 684 фабрики, време во кое над 200.000 луѓе ги загубија своите работни места. Неодоговорните политики на СДС во минатото, само во Скопје затворија илјадници работни места. Тешка и мачна судбина поради неодговорноста на СДС имаа и над 7.000 вработени од МЗТ, 1.450 од „Славија“, 1.000 од „Газела“ и 750 од „Треска-мебел“, кои сите до еден останаа без своите работни места. Политиките на СДС во минатото донесоа 38 отсто невработеност и огромна стапка на сиромаштија. Стапката што со позитивните економски политики на ВМРО-ДПМНЕ беше сведена на 22,9 отсто.
Граѓаните гледаат дека политиките на СДС не се сменети. Како и во минатото така и сега, владеењето на СДС значи смрт за македонската економија, зголемување на невработеноста и пад на производството.
Владеењето на СДС носи сиромаштија за граѓаните. Граѓаните гледаат дека само за 4 месеци од владеењето на СДС бележиме пад на БДП од 1,8 отсто, 1,6 отсто е падната активноста на банките, а државата со задолжување и од државните резерви стопи 500 милиони евра, без некој да знае на што се потрошени.
Граѓаните го гледаат тоа и затоа ќе го казнат СДС за неговите неодговорни политики кон економијата на претстојните локлани избори на 15 октомври, рече Стојановски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.