Daily news
Работнички подобар од Вардар во скопското дерби
Темпото на натпреварувања очигледно не му одговара на македонскиот шампион Вардар откако „црвено-црните“ го доживеаја третиот пораз во низа, овој пат од Работнички со 3:1 во градското дерби.
Победата ја најави Сержињо со гол во 17. минута, но Вардар успеа да израмни преку Дејан Блажевски од пенал во 70. минута од мечот. Само три минути подоцна имаше пенал од другата страна и Остоја Стјепановиќ ги доведе „романтичарите“ во ново водство, пред Миле Тодоров во 82. минута да го постави конечниот резултат.
Со овој пораз се зголемува притисокот на тренерот на Вардар, Јаневски, бидејќи се работи за трет загубен натпревар во низа – по катастрофата против Реал Сосиедад во Скопје (0:5), дојде поразот кај Победа на гости (0:1) во неделата. Вардар е трет на табелата со 19 поени, дури 9 помалку од лидерите Шкендија, иако шампионот има уште два неодиграни натпревари.
Најинтересен меч се одигра во Струмица, каде што Академија Пандев имаше водство од 2:0 против Шкендија, пред тетовци да израмнат на 2:2 со одличната игра во второто полувреме. Сепак, победата на „академците“ беше осигурана во 90. минута со голот на Чешмеџиев, и тие сега се само седум поени зад Шкендија со еден меч помалку од ривалите.
1.МФЛ, 12. КОЛО
Академија Пандев – Шкендија 3:2 (1:0)
Пелистер – Силекс 1:2 (1:0)
Работнички – Вардар 3:1 (1:0)
Ренова – Скопје 5:1 (0:0)
Шкупи – Победа 1:0 (0:0)
ТАБЕЛА: 1.Шкендија 28, 2.Академија Пандев 21 (-1), 3.Вардар 19 (-2), 4.Силекс 18, 5.Шкупи 15, 6.Ренова 14, 7.Работнички 13 (-1), 8.Пелистер 12, 9.Победа 12, 10.Скопје 6.
Фото: ФК Вардар
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.