Daily news
(Видео) Делев: Лошата економска политика на СДС ја однесе државата во рецесија
Оваа Влада нема концепт и знаење како да ја води економијата. Македонија ќе продолжи економски да тоне бидејќи црното економско трио Заев, Тевдовски и Анѓушев немаат намера да ги намалат непродуктивните трошоци и буџетскиот дефицит. Доколку навистина е потребна консолидација на буџетот, тоа се решава на два начина. Или со буџетско намалување на буџетскиот дефицит или со нови инвестиции и проекти. Очигледно црното економско трио нема намера да реализира капитални проекти што ќе бидат дополнителна вредност и ќе го повлечат растот, рече на денешната прес-конференција Христијан Делев од ВМРО-ДПМНЕ.
„Заев, Тевдовски и Анѓушев очекуваат граѓаните и компаниите да го платат цехот за нивните политики. Дури и во најголемата економска и финансиска криза владата на ВМРО ДПМНЕ не помисли да ги зголеми даноците на товар на граѓаните“, нагласи Делев.
Тој рече дека Зоран Заев јавно најавил дека Владата планира да изврши покачување на даноците и дека покачувањето на даноците ќе значи помалку пари кај граѓаните и во фирмите, помалку расположливи средства за инвестиции и отворање нови работни места, како и зголемување на сивата економија и зголемената евазија на даноците.
„Зголемувањето на даноците неминовно ќе влијае на падот на стопанството така што стопанствениците ќе немаат друг избор, освен да започнат со отпуштање голем број вработени. СДС со тоа директно ќе придонесе голем број граѓани да ги загубат своите работни места и извор на егзистенција. СДС повторно ги враќа граѓаните во мрачните времиња на транзицијата кога стапката на невработеност изнесуваше над 38 отсто, која само поради развојните економски политики беше сведена на 22 отсто“, рече Делев.
Граѓаните, како што нагласи Делев, веќе ја чувствуваат неспособноста на СДС на сопствена кожа со падот на просечната плата и намалувањето на индустриското производство од 2,2 отсто во јуни 2017 во однос на јуни 2016 година.
„Со секој следен чекор на Владата економијата и граѓаните сè повеќе тонат. СДС сака да го исцеди и последниот денар од граѓаните и стопанството. Зголемувањето на даноците дополнително ќе го забрза падот кон економското дно. Имено, од кога на власт е СДС, економијата е во слободен пад, БДП за последниот квартал е намален 1,8 процент со тенденција и понатаму да опаѓа. Економијата тоне, даноците ќе се покачуваат, а Заев немилосрдно се задолжува. Министерството за финансии вчера објави проспект за нова аукција за вторник на која е предвидено Република Македонија да се задолжи со нови 71 милион евра“, рече Делев.
Тој нагласи дека со задолжувањето во вторникот сумата со која СДС ќе ја задолжи државата во период од само 5 месеци ќе се искачи на повеќе од 430 милиони евра.
„Дополнително на тоа ако го додадеме и вадењето 180 милиони евра од државните девизни резерви, без објаснување и јасно дефинирана потреба за државата, доаѓаме до неверојатна сума од 610 милиони евра за кои граѓаните не знаат за што и како се потрошени“, нагласи на крајот Делев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.