Славче Трпески, член на Извршниот комитет на ВМРО-ДПМНЕ, се пофали денес дека и годинава, благодарение на успешните политики на оваа партија, Македонија е високо рангирана во годишниот извештај на „Дуинг бизнис“.

„Успешните економски политики на ВМРО-ДПМНЕ во изминатите 10 години и јасната стратегија за раст и развој на Република Македонија се чувствуваат и во последната година од техничката влада предводена од ВМРО-ДПМНЕ. Имено, во годишниот извештај „Дуинг бизнис“ на Светска банка, Република Македонија е рангирана на 11. место за водење бизнис во светот и на 5. место во Европа. Извештајот е правен врз основа на информации и спроведени реформи собрани во периодот од ноември 2016 година до јуни 2017 година.

„Дуинг бизнис“ на Светска банка ги потврдува реформите и политиките што владата предводена од ВМРО-ДПМНЕ ги спроведе во периодот од 2006 до 2017 година. Владата предводена од ВМРО-ДПМНЕ со напорна работа ја позиционираа Република Македонија од 92. место во извештајот за водење бизнис за 2007 година, кој излезе во октомври 2006 година, за денеска во годинашниот извештај да бидеме на 11-тото место. Република Македонија во неколку извештаи од Светска банка беше и топ-реформатор на годината.

Во годинашниот извештај, иако за целиот пресметковен период со државата управуваше техничката влада, а Собранието воопшто не функционираше, институциите во Македонија продолжија со реформите така што во споредба со извештајот на „Дуинг бизнис“ за 2017 година, Република Македонија има напредок во рангирањето во земањето кредит и од 16. место лани, годинава Македонија е рангирана на 12. место. Најголем напредок оваа година имаме во заштита на малцинските акционери и од 12-тото место минатата година, оваа сме на високото 4. место во светот, во критериумот спроведување договори имаме напредок од едно место, односно од 36. место минатата година, во 35. место оваа година, а напредок имаме и во критериумот решавање на несолветноста – од 32. место минатата година, оваа сме рангирани на 30. место во светот. Напредок е забележан и во регистрирањето на сопственоста во делот на квалитетот на земјишната администрација за еден процентен поен, како и во критериумот за прекуграничната трговија, но се недоволни за раст на скалата на „Дуинг бизнис“ во овие критериуми, па таму се задржани постојните 48. односно 27. место.

Падот на листата на „Дуинг бизнис“ од минатогодишното 10. место на годинашното 11. место се должи на големиот напредок што го има Грузија од минатогодишното 16. место на годинашното 9. место, со што Шведска и Македонија ги зазедоа 10., односно 11. место, од една страна, и кризата што ги оневозможи планираните реформи, со чија имплементација веруваме дека ќе овозможеа и подобро рангирање на Република Македонија од 10. место во извештајот на „Дуинг бизнис“ за 2017 година.

За одбележување е и фактот дека од топ-20 држави по создавање услови за правење бизнис за 2018 година, дури 18 држави се високоразвиени, а само Република Македонија и Грузија се единствени средно развиени држави, што само го потврдува фактот дека и малите држави со вистински реформски влади може многу да напредуваат. Македонија од 92. место во 2007 напредуваше дури 81 место и денес сме 11. држава во светот по правење бизнис.

Новата Влада треба да ги следи стапките на владата што ја предводеше ВМРО-ДПМНЕ и да продолжи со стимулативно-активни мерки, кои ги поедноставуваат и забрзуваат процедурите, но и истовремено да промовираат стабилна бизнис-околина со ниски даноци. Ако по утрото денот се познава, денешното ново задолжување од 71 милион евра или севкупно задолжување од над 600 милиони евра за само пет месеци ќе придонесе ваквата успешна економска приказна набргу да стане минато“, порача Трпески.