Еден ден откако Пол Манафорт, поранешен менаџер на кампањата на претседателот на САД, Доналд Трамп, беше обвинет со својот помошник за перење пари и заговор против САД, а вината за лажно сведочење ја призна и советникот на претседателот, Џорџ Пападопулос, весникот „Гардијан“ објави напис во кој се занимава со истрагата за руското мешање во кампањата за претседателските избори во САД. Најважното прашање е – колку блиску се истражителите до Трамп?

Дента кога Трамп го повика Џејмс Коми на вечера и потоа од директорот на ФБИ побара залог за верност, во канцеларијате се одржа уште еден клучен разговор. Џорџ Пападополус бил испрашуван за контактите со професорот поврзан со Русија, кој му понудил валкани алишта на Tрамп за неговата ривалка Хилари Клинтон.

Пападопулос лажел за време на состанокот на 27 јануари. Тоа се дозна вчера. Тој е првиот човек што беше обвинет за врски со Русија за време на кампањата на Трамп за претседателските избори минатата година во Америка. Откако во јули беше уапсен на меѓународниот аеродром „Далас“, во неколку наврати се сретнал со претставници на владата на САД за да им даде информации и одговори на некои прашања, што значи дека тој ја сменил страната и почнал да му помага на специјалниот советник одговорен за истрагата, Роберт Милер.
Прит Барара, поранешен американски обвинител за јужниот дел на Њујорк, кој доби отказ од Трамп, на „Твитер“ напиша дека Милер има соработник и дека тоа е Јоргос Пападопулос.

„Ова е важно, а времето ќе покаже колку“, напиша тој на „Твитер“.

Сето ова беше откриено истиот ден кога поранешниот менаџер на кампањата, Пол Mанафорт, и неговиот заменик, Рик Гејтс, беа обвинети за заговор против САД, за перење пари, за нерегистрирање како странски агенти, за давање лажни изјави и за тоа што не пријавиле банкарски сметки во странство. Ова се првите јавни акции во истрагата за можна поврзаност помеѓу Трамп и Москва. Дури и во најдобрите денови на американскиот претседател тоа би било крајно штетно, пишува „Гардијан“. Трамп со својот карактеристичен начин се обиде да ја намали важноста на истрагата и да го сврти вниманието на нешто друго.

„Извинете, но тоа беше пред неколку години, пред Пол Манафорт воопшто да биде дел од кампањата. Но, зошто не се во фокусот и демократите со Хилари“, Трамп напиша на „Твитер“.

Точно е дека во обвинението против Манафорт не се спомнува воопшто Трамп, ниту руската вмешаност во кампањата, но постои индиција дека тој е обвинет за нелегално странско лобирање во име на украински политички партии со проруски став од 2005 до 2016 година. Ако партнерите на Манафорт, кои се поврзани со Кремљ, биле свесни за неговото перење пари, тоа им овозможило да влијаат на кампањата на Доналд Трамп.
А фактот дека со толку многу скелети во плакарот Манафорт сè уште работел за Трамп, укажува на тоа дека во кампањата не се користеле надворешни проверки. Обвинението ги товари Maнафорт и Гејтс дека испрале десетици милиони долари преку странски компании и банкарски сметки.

Mанафорт ја водеше кампањата на Трамп од март до август 2016 година, а исто така беше еден од учесниците на состанокот во јуни, што се одржа во кулата „Трамп“ со адвокатот поврзан со Кремљ. Гејтс никогаш не ја напушти кампањата, беше во инаугурацискиот одбор и неколкупати го посети Трамп во Белата куќа.

Во обвинението против Пападопулос се нуди најголемиот доказ за руската вмешаност во кампањата на Трамп. Белата куќа, веројатно, ќе тврди дека Пападопулос, кој се изјасни за виновен за давање лажни изјави пред агентите на ФБИ, одиграл маргинална улога во кампањата. Но, во обвинението стои дека Пападопулос ја спречил истрагата на ФБИ за постоење каква било врска меѓу поединци поврзани со кампањата и напорите на руската влада да се замеша во изборите во 2016 година во САД. Пападопулос изјавил пред ФБИ дека бил во контакт со неименуван странски професор кој му рекол дека има валкани работи за Хилари Клинтон. Тоа било во форма на имејлови, при што Пападопулос тврдел дека контактите се случиле пред да ѝ се приклучи на кампањата на Трамп, спротивно од тоа што стои во обвинението. Сето ова Трамп го оцени како лов на вештерк“.