Daily news
Димитров во работна посета на Рига
Во рамките на регионалната посета на балтичките земји, министерот за надворешни работи, Никола Димитров, вчера и денеска престојуваше во работна посета на Република Латвија, каде што оствари средба со својот домаќин, министерот за надворeшни работи на Република Латвија, Едгарс Ринкевич, министерот за одбрана, Раимондс Бергманис, како и со потпретседателот на парламентот на Латвија, Инесе Либина Егнере.
Димитров на средбата со министерот Ринкевич ja претставил одлучностa на Владата да ги реализира неопходните реформски активности со цел Република Македонија да стане полноправна членка на ЕУ и НАТО. Тој потенцираше:
„Ние не само што не се плашиме од строги стандарди туку и ги поддржуваме како неопходен услов за подобрување и засилување на нашите институции. Евро-атлантската интеграција стимулира стабилност и просперитет на Балтикот, што треба да служи како пример и инспирација и за Балканот“, нагласи Димитров.
Димитров го информира латвискиот колега и за активностите преземени во функција на суштинско унапредување на добрососедските односи и регионалната соработка.
Министерот Ринкевич ги поздрави и даде отворена поддршка за реформските политики на Владата истакнувајќи дека Латвија принципиелно и со засилен интензитет ќе продолжи да ги поддржува напорите на Република Македонија за зачленување во ЕУ и НАТО.
„Oд страна на Република Латвија постои и волја и подготвеност за поддржување на македонското членство во ЕУ и НАТО“, истакна Ринкевич.
Показател за тоа е и формирањето на нова парламентарна група за пријателство со Македонија, која ќе помогне во продлабочувањето на конструктивната соработка меѓу двете земји.
Новата парламентарна група за пријателство е конкретен показател за искрената поддршка за Република Македонија, која на Димитров му ја пренесе и потпретседателката на парламентот на Латвија, Инесе Либина Егнере, на средба во латвискиот парламент. Таа изрази и подготвеност за засилување на соработката меѓу парламентите. Силна поддршка за Република Македонија дојде и од Лолита Чигане, претседавач на Комисијата за европски прашања.
„Македонското општество е цврсто и издржливо, дури и во време на кризи. Македонија заслужува позитивен фидбек кој може само да го охрабри продолжувањето на потребните реформи“, рече Чигане.
Воедно, таа додаде дека балтичкото искуство e доказ за позитивното влијание на ЕУ и изрази надеж дека таква улога ЕУ ќе игра и на Балканот.
На реномираниот латвиски Институт за меѓународни работи, во рамките на експертската дискусија, министерот Димитров се осврна на предизвиците на Република Македонија со кои се соочува на патот до ЕУ и НАТО. Министерот Димитров даде интервјуa за „ЛТВ 1“, националната телевизија на Латвија, „ТВ 24“ и за латвиското национално радио. Регионалната балтичка турнеја завршува утре со работна посета на Литванија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.