Daily news
Изложба: „Визуелни сеќавања“ на Александра Мириќ од Ниш
Во Музејот на град Скопје вечерва со почеток во 19.00 часот во сала 1 ќе биде отворена изложбата на Александра Мириќ, архитект-конзерватор, претставник на младата генерација на балканската ликовна сцена. Авторката е посветена на проучување и промоција на културното наследство, како и на истражување на културниот идентитет и неговата визуелизација со различни средства на изразување.
Валоризацијата на градителското наследство ја изучувала на Универзитетот во Прованса. Со докторат од областа на археологијата се здобила на Универзитетот во Лион, а со докторат од областа на архитектурата на Универзитетот во Ниш. Досега имала три самостојни изложби во Ниш и една во Париз. Учествувала на повеќе од десетина меѓународни ликовни колонии и групни изложби.
На единствениот ликовен конкурс во Србија посветени на надреализмот, „Во чест на Матиќ“, нејзината слика „Светците кои маршираат“ од циклусот „Радосници“ ја доби првата награда. Нејзините дела се наоѓаат во разни галериски фондови и приватни колекции во земјата и ширум светот.
Проектот „Визуелни сеќавања“ на Александра Мириќ претставува материјализација на искусеното, канал за пренесување на нејзините емотивни сензации и доживеани наративи. Преку двата циклуса („Места“ и „Чувства“), авторката визуелно ги отелотворува просторот, луѓето, чувствата и мислите што ја опкружувале и обземале во еден за неа битен и бурен период што оставил печат врз нејзиниот личен и професионален развој. Се работи за дела создадени во текот на седумгодишното живеење на релација Србија – Прованса, но и за делата што сè уште ги создава носејќи го во себе тоа искуство. Во споменатиот период авторката има пропатувано неколку континенти, запознавајќи и поврзувајќи се со луѓе од целиот свет. Со оваа изложба вторката се враќа во Скопје, за кое ја врзуваат нејзините корени и големата љубов.
Не избегнувајќи ја својата професија (Александра е специјалист за споменици на културата и двоен доктор на науки во областа на архитектурата и археологијата), таа го интерпретира својот свет што никако не е статичен.
Трагајќи по сопствениот сликарски израз, таа трага и по своето место во времето, во науката, во љубовта, во семејството. За неа наследството не е само историја заробена во камен. За неа минатото е инспирација што носи радост и игра, отелотворена во нејзините дела.
Преку користење интензивен колорит и разиграни детално разработени форми, Александра Мириќ ги споделува своите перцепции за местата и луѓето. Раскошноста и полнотијата на колоритот се огледало на ризницата на
најразлични чувства од кои авторката не се срами. Напротив! Нејзините дела емитираат снажен поттик набљудувачот да се вклучи, да ги спознае, да ги совлада сопствените бариери и да зачекори храбро во сопствениот свет каде што се` уште се разменуваат нежни погледи, каде што оние кои веќе не се со нас се`уште седат еден крај друг.
Во соработка со Музеј на Град Скопје, проектот е поддржан од страна на Градот Ниш, Студентскиот култур центар Ниш и Нишкиот културен центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.