Во врска со денешниот текст на „Макфакс“ со наслов „За серијата ‘Македонија’ најмногу пари влегле во Хрватска, дел завршил и на сметка во САД“ во редакцијата стигна демант од продуцентската куќа „Јадран филм“ во кој е нејасно што точно се демантира. За сите информации објавени во „Макфакс“ се користени официјални извори. Текстот ви го пренесуваме во целост.

Поврзано со вашиот текст “За серијата ‘Македонија’ најмногу пари влегле во Хрватска, дел завршил и на сметка во САД“ длабоко сме разочарани и непријатно изненадени од количината на лаги и конструкции кои вашиот медиум и новинарката Ана Василевска ги пишува во самиот текст и неприродно за новинар и новинарската дејност навива за една страна наместо да ги презентира фактите.

Како прво, изненадени сме од големиот број граматички грешки во текстот, веројатно е брзано во конструкцијата на лагите кои се објавени, и дополнително и зборовите кои се бирани во самиот текст. Прво одлучете се дали се денари или евра, потоа кога веќе пишувате текст наведете кои фирми, од кога се во стечај и слично.

Во текстот застанувате во одбрана в.д. директорот на Агенцијата за филм, Горјан Тозија, и неговите обвинувања, а во ниеден случај не ја пренесовте изјавата на Винко Грубишиќ и неговите обвинувања кон Горјан Тозија. Да Ве потсетам, за финансиските средства има извештај кој е доставен и дека тој има дадено двојна гаранција за секој потрошен денар, а Вие упорно го криете тој факт. Нашата матична куќа „Јадран филм“ вреди повеќе десетици милиони евра и нема долгови, за разлика од Горјан Тозија. „Јадран филм“ е најголемо и единствено студио кое ја преживеа транзицијата.

Продуценстската куќа „Јадран филм“ во однос на потрошените финансиски средства има доставено валиден ревизорски извештај од овластена ревизорска куќа со кој се потврдува законското и наменското трошење на средствата. Ревизорскиот извештај е проследен до сите надлежни и релевантни институции во државава. Во иднина пред да објавувате небулозни и неточни податоци најдобро би било претходно да ги проверите информациите!

Вашето тврдење дека повеќе од 65% од средствата наменети за реализација на првата сезона, односно серијата се потрошени во странство, односно изнесени надвор од Македонија може да се демантира со проста математика. Финансиските средства со кои „Јадран филм“ располагал се 52,9% од вкупниот буџет за реализација на првата сезона, односно 17,5% од вкупниот буџет за реализација на играната серија или јасно и прецизно, тоа се 49.442.160 денари или приближно 800.000 евра. Значи Вашите паушални и непроверени информации се повеќе од провидни – не постои математичка операција која ќе ја потврди Вашата информација за потрошени над 65% надвор од Македонија и прекршување на Законот за филмска дејност. Кога сме кај Законот за филмска дејност – тој е еден и единствен – така што недозволиво е како новинар кој ја истражува оваа приказна како што Вие милувате да кажете речиси две години да не знаете дека не постојат НЕКОЛКУ Закони за филмска дејност!

Дополнително вршите груба дезинформација со тоа што наведувате дека пари се наменети за медиумски куќи. Тоа е потполна лага.
„Не се исклучена можноста да се потврдат сознанијата на ‘Макфакс’ дека преку овие фирми се мотивирани медиумски куќи во полза на пропагандни текстови за поранешната македонска влада“.

Дополнително, ВЕ замолувам да не ја лажете јавноста дека истрага се води тајно од страна на ДОРХ туку согласно со важечките закони во Р. Хрватска не можат да ви одговорат на вашите прашања и дека податоците за кое било лице се тајна и дека таква информација не можат да Ви дадат. Изјавата на портпаролот на ДОРХ веднаш ја проверивме и таа изјави дека такво нешто не изјавила.

И кога веќе говорите за договорот, треба веродостојно да пренесете дека договорот не е прекинат туку еднострано раскинат од страна в.д. директорот на Агенцијата за филм, Горјан Тозија, иако тој таква можност нема во договорот кој е потпишан. Би требало да знаете дека договорот може само да се раскине со одлука од страна на Управниот одбор (така стои во договорот) и никако поинаку, а таква одлука од Управниот одбор нема. Во оваа пригода уште еднаш сакам да ја информирам јавноста дека кога говориме за непочитување на Законот за филмска дејност тоа ЕДИНСТВЕНО го прави в.д. директорот на Агенцијата за филм. Горјан Тозија во постапка која е незаконска, без почитување на највисокиот управувачки орган на Агенцијата за филм, УПРАВНИОТ ОДБОР, ги блокира средствата на наменската сметка на „Јадран филм“ за проектот „Македонија“. Зошто тоа не го прашавте в.д. директорот на Агенцијата за филм, Горјан Тозија?

Бараме јавно да се извините за Вашиот текст и да ѝ се извините на јавноста за Вашите конструирани инсинуации и лаги!

Со почит

Јадран Филм дооел и екипата на проектот „Македонија“