Daily news
Антонијо Милошоски одамна се токми, ќе успее ли да го преземе местото на Груевски!?
Додека Никола Груевски ги ситни последните денови како претседател на ВМРО-ДПМНЕ, токму Антонијо Милошоски се чини е еден од најверните луѓе до лидерот, кој рамо до рамо секоја вечер стои до него на протестите на опозицијата. Милошоски јавно не открива дали посакува да седне на претседателската функција во белата палата, но неговото име одамна се врти во барабанот на можни кандидати за наследник на Груевски.
Антонијо Милошоски е член на Извршниот комитет на ВМРО-ДПМНЕ од 2005 година. Бил потпретседател на УМС на ВМРО-ДПМНЕ од 1997 до 1998 и член на ИК на УМС на ВМРО-ДПМНЕ од 1995 до 1997 година. Во периодот 1999 – 2000 година е шеф на кабинетот на потпретседателот на владата, Доста Димовска, а во периодот од мај 2000 до септември 2001 година е портпарол на владата.
Во 2006 Милошоски станува министер за надворешни работи до 2011 година кога по парламентарните избори се повлекува од министерското место.
Прифатен од меѓународната заедница, посветен активист од студентските денови и докажан дека е верен на партијата уште од времето на претходниот лидер Љубчо Георгиевски – ќе бидат ли додволни критеруми за членството да го прифати Милошоски за иден партиски лидер?
Медиумите одамна го токмат Милошоски за претседател на ВМРО-ДПМНЕ, но како главна пречка најчесто се споменуваше стравот на Груевски да му ја предаде партијата нему поради опасноста од чистка, односно Милошоски да му го направи на Груевски истото што тој го направи со Љубчо Георгиевски и старите кадри во партијата. Низа критики на контото на Милошоски стигнуваа и за неговото пробугарско расположение и блискоста со бугарското крило на ВМРО-ДПМНЕ.
Сепак, црна дамка во кариерата на Милошоски остава скандалот со злоупотребата на службената положба во Собранието за расчистување бизнис-сметки со бизнис-конкуренти на неговото семејство, што ги обелодени опозицијата пред неколку години, а позврзани со купувањето на општинската зграда во општина Пласница, како и обвинувањата за нерегуларности со преземање на Авто-мото сојузот.
Антонијо Милошоски е еден од функционерите на ВМРО-ДПМНЕ против кого СЈО нема поведено обвинение за криминал, но неговото име се појави во дел од бомбите на СДСМ кога во телефонските разговори со Груевски дава предлози за името, за решение на спорот со Грција, како и за политички реваншизам кога во дел од разговорите Милошоски бара местена лустрација за судија.
Милошоски по професија е политиколог. Дипломирал на Правниот факултет во Скопје, а во периодот 2001 – 2002 година завршува магистерски студии по евроинтеграции на Универзитетот „Фридрих Вилхем“ во Бон, Германија. Од ноември 2002 година е докторанд на политички науки на универзитетот „Герхард Меркатор“ во Дујсбург, Германија, каде што работел како научен соработник до 2006 година кога беше назначен за министер за надворешни работи на Република Македонија.
Г.Н.Р
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.