Daily news
Груевски и Јанкулоска фаворизирале економски оператор за набавката на „мерцедесот“
![](https://makfax.com.mk/wp-content/uploads/2018/02/Gruevski-pred-sudot-so-Ivo-Kotevski.jpg)
Денеска во кривичниот суд по две одложувања почна главната расправа за набавката на екстралуксузниот „мерцедес“. Во воедниот збор на обвинителството, беше посочено дека најмалку што се очекува од највисоките функционери на Министерството за внатрешни работи е да не ги почитуваат законите и да потпаѓаат под разни незаконски влијанија. Во овој случај ќе докажеме дека во 2012 година обвинетиот Никола Груевски, како премиер со искористување на своето реално влијание и службена положба, побарал од обвинетата Гордана Јанкулоска како министерка за внатрешни работи во Владата да се изврши службено дејствие што не смеело да се изврши и тоа, да се спроведе јавна набавка во која Министерството за внатрешни работи ќе купи ново блиндирано патничко моторно возило од марката „мерцедес“ модел С 600 Гард, така што во постапката да се фаворизира економскиот оператор „Мак аутостар ДООЕЛ Скопје“. „Обвинетата Гордана Јанкулоска за да го исполни барањето на обвинетиот Никола Груевски со умисла го поттикнала обвинетиот Ѓоко Поповски, службено лице – помошник на министерот за внатрешни работи, да стори кривично дело злоупотреба на службената положба и овластување. Ова ќе го докажеме од аудиоснимките и од другите предложени докази“, рече обвинителот Стевчо Донев.
„Од писмените докази и изјавите на сведоците ќе докажеме дека обвинетиот Ѓоко Поповски, кој бил службено лице – помошник на министерот за внатрешни работи, за да го исполни барањето на обвинетата Гордана Јанкулоска, на незаконски начин со искористување на својата службена положба и овластувања при вршење јавни набавки, прибавил за економскиот оператор „Мак аутостар ДООЕЛ Скопје“ корист што се состои од доделување договор за купопродажба, сервисирање и одржување на блиндирано патничко моторно возило марка ‘мерцедес модел С 600 гард’. Од писмените докази од Државниот завод за индустриска сопственост и од сообраќајно-техничкото вештачење произлегува дека обвинетиот Ѓоко Поповски, со цел економскиот оператор „Мак аутостар ДООЕЛ Скопје“ да нема конкуренција во постапката, а и за неговото фаворизирање, ставил повеќе технички спецификации што се однесуваат за возилото ‘мерцедес С 600 гард’ кои упатуваат на конкретно производство и трговски марки и без да биде наведено дека можат да се дадат и понуди со други спецификации кои се еквивалентни на наведените во тендерската документација“, дополни Донев.
Во постапката само економскиот оператор „Мак аутостарДООЕЛ Скопје“ дал понуда на 15.05.2012 година и бил единствен понудувач. „Ќе докажеме дека обвинетиот Ѓоко Поповски, иако бил свесен за незаконското фаворизирање на економскиот оператор и за нерационалното искористување на средствата на Министерството, сепак, склучил договорот за јавна набавка со економскиот оператор „Мак аутостар ДООЕЛ Скопје“ со вредност на договорот од вкупно 35.226.000 денари. „Од аудиоснимките ќе докажеме и дека иако јавната набавка била спроведена како да е за потребите на Министерството за внатрешни работи, обвинетата Гордана Јанкулоска го поттикнала обвинетиот Ѓоко Поповски да го стори кривичното дело за потоа возилото од Министерството за внатрешни работи да се даде на користење и на претседателот на Владата на Република Македонија, на обвинетиот Никола Груевски, кој сакал да користи такво ново блиндирано патничко моторно возило, но не сакал во јавноста да се дознае дека тој како претседател на Владата користи такво луксузно возило“, изјави обвинителот пред судискиот совет. За главната расправа на 12, 15 и 21 март, кога почнува доказната постапка, треба да бидат сослушани десетина сведоци на обвинителтвото.
В. М.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
![](https://makfax.com.mk/wp-content/uploads/2024/05/thumbnail_The_Business_of_Pleasure_2.jpg)
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
![](https://makfax.com.mk/wp-content/uploads/2018/03/1-1-3.jpg)
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
![](https://makfax.com.mk/wp-content/uploads/2018/08/gruevski-sud.jpg)
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.